ԵՐԵՎԱՆ, 30 ՀՈՒՆՎԱՐԻ, ԱՐՄԵՆՊՐԵՍ: Վատիկանը մաքրության օր Է հայտարարել անօթեւանների համար, հաղորդում Է «Արմենպրես»-ը՝ հղում անելով The Independent -ին: 

Սուրբ աթոռի որոշման համաձայն՝ ամեն երկուշաբթի Սուրբ Պետրոսի հրապարակում անվճար կկտրեն բոլոր անօթեւանների մազերը եւ կսափրեն նրանց: Վատիկանին իրենց ծառայություններն արդեն առաջարկել են իտալացի վարսավիրները, որոնք երկուշաբթի օրն ավանդաբար չեն աշխատում, նրանք Էլ նվիրաբերել են վարսավիրական բազկաթոռներ, հայելիներ եւ վարսահարդարման հավաքանիներ: Բացի դրանից, կտեղակայվեն մշտապես գործող շարժական ցնցուղարաններ: Մաքրության առաջին օրը Վատիկանում տեղի կունենա փետրվարի 16-ին: 

Ինչպես պարզաբանել են Հռոմի կուրիայում, ցնցուղարանների տեղակայման եւ սափրիչների ծառայությունների տրամադրման գաղափարը հայտնվել Է տակավին անցյալ տարի, երբ անօթեւաններից մեկը կարդինալներից մեկին գանգատվել Է, որ Հռոմում ուտելիք գտնելը դժվար չԷ, բայց լոգանք ընդունելն իսկական խնդիր Է: