Դեղերի ոլորտի ընկերությունները բարձրաձայնել են մաքսազերծմանն առնչվող խնդիրների մասին
ԵՐԵՎԱՆ, 27 ՀՈՒՆՎԱՐԻ, ԱՐՄԵՊՐԵՍ: Դեղեր և բժշկական նշանակության ապրանքներ ներմուծող և արտադրող ընկերությունների ղեկավարները, ինչպես նաև դեղագործական ընկերությունների ներկայացուցիչները մաքսազերծման հետ առնչվող խնդիրները ներկայացրել են առողջապահության նախարար Արմեն Մուրադյանին: Ինչպես «Արմենպրես»-ին տեղեկացրին ՀՀ առողջապահության նախարարության հասարակայնության հետ կապերի բաժնից, նախարար Արմեն Մուրադյանը հորդորել է առաջնորդվել պաշտոնական փաստաթղթերով, որոնցով անցումային շրջանում կարգավորվում են ներմուծման և արտահանման գործընթացները` նպատակ ունենալով ապահավել դեղերի և բժշկական նշանակության ապրանքների գների կայունությունը։
Դեռ անցած շաբաթ ՀՀ առողջապահության նախարար Արմեն Մուրադյանը Հայաստան դեղեր ներկրող և արտադրող ընկերությունների ղեկավարների հետ քննարկել էր Եվրասիական տնտեսական միությունում դեղերի և բժշկական նշանակության ապրանքների շրջանառության միասնական սկզբունքները և կանոնները սահմանող միջազգային պայմանագրերը:
Նախորդ հանդիպման ընթացքում բարձրացվել են դեղերի և բժշկական նշանակության ապրանքների ներմուծման և արտահանման գործում առկա խնդիրներ, որոնք առնչվում են մաքսազերծման հետ։ Դրանց լուծումներ տալու նպատակով Արմեն Մուրադյանը հարցը ներկայացրել էր ՀՀ վարչապետ Հովիկ Աբրահամյանին։