Գեղարքունիքի մարզպետարանում անցկացվեց ոռոգման նախապատրաստական աշխատանքներին նվիրված խորհրդակցություն
ԳԱՎԱՌ, 27 ՀՈՒՆՎԱՐԻ, ԱՐՄԵՆՊՐԵՍ: Գեղարքունիքի մարզպետ Ռաֆիկ Գրիգորյանի մոտ կայացած խորհրդակցությունն անդրադարձավ մարզի ջրօգտագործող ընկերությունների 2014 թվականի գործունեությանը եւ հերթական գյուղատնտեսական տարվա ոռոգման շրջանի նախապատրաստական աշխատանքների հետ կապված խնդիրներին: «Արմենպրես»-ի տեղեկացմամբ` խորհրդակցությանը մասնակցում էին Գավառի, Մարտունու, Վարդենիսի ջրօգտագործող ընկերությունների տնօրենները, մարզպետարանի աշխատակազմի բնապահպանության և գյուղատնտեսության վարչության աշխատակիցներ: Խորհրդակցության ընթացքում քննարկվեցին Գավառի, Մարտունու եւ Վարդենիսի ՋՕԸ-երում առկա եւ հրատապ լուծում պահանձող մի շարք խնդիրներ: Քննարկումների արդյունքում մարզի ղեկավարը հանձնարարեց ՋՕԸ տնօրեններին` սահմանված ժամկետում մարզպետարան ներկայացնել տեղեկատվություն` կապված ՋՕԸ-երի աշխատողների աշխատավարձերի պարտքերի եւ դրանց մարման ընթացքի մասին, ինչպես նաեւ աշխատանքների տանել ոռոգման ջրի վարձավճարների 2014 թվականի պարտքերի հավաքագրման ցուցանիշները 100%-ի հասցնելու ուղղությամբ: Այս տարվա ոռոգման սեզոնը նորմալ կազմակերպելու համար Ռաֆիկ Գրիգորյանը հանձնարարեց նաեւ ՋՕԸ-երում իրականացնել գույքագրում եւ նախապատրաստական աշխատանքների կազմակերպման վերաբերյալ տեղեկատվություն ներկայացնել մարզպետարան:
Խոսրով Խլղաթյան