Ադրբեջանում ոստիկաններին արգելել է օգտվել սոցցանցերից
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Ադրբեջանի ներքին գործերի նախարարությունը ոստիկան աշխատակիցներին արգելել է օգտվել սոցիալական ցանցերից:
Ինչպես հաղորդում է «Արմենպրես»-ը` վկայակոչելով qafqazinfo.az լրատվական կայքը, վերջին շրջանում ՆԳՆ-ին լրջորեն անհանգստացրել են սոցիալական ցանցերում ծառայության մեջ գտնվող ոստիկանների գրառումները: Որոշ ոստիկաններ սոցցանցերում տեղադրել են ոստիկանական հագուստով եւ զենքով իրենց լուսանկարները, ինչն էլ դարձել է նոր արգելքի պատճառ: Ղարադաղի շրջանի ոստիկանության վարչության սոցիալական ցանցում զենքով լուսանկար տեղադրած աշխատակիցը խստորեն պատժվել է: Նա հեռացվել է ՆԳՆ համակարգից:
Ադրբեջանի ՆԳ նախարար Ռամիլ Ուսուբովը երեկ հանդիպել է երիտասարդ ոստիկանների եւ նրան ծնողների հետ եւ բացատրել է սոցցանցերում նման արգելք սահմանելու իր որոշումը:
Ադրբեջանի ՆԳՆ մամուլի ծառայության պետի տեղակալ Էհսան Զահիդովն այդ առնչությամբ կայքի հարցադրմանն այսպես է պատասխանել. «Ադրբեջանի Հանրապետության բոլոր քաղաքացիների նման ներքին գործերի մարմինների անձնակազմը եւս Սահմանադրությամբ հաստատված բոլոր իրավունքներից օգտվում է առանց սահմանափակումների»: