Հայաստանն ու Վիետնամը քայլեր կձեռնարկեն ապրանքաշրջանառության ծավալների մեծացման ուղղությամբ
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Վիետնամի արդյունաբերության և առևտրի նախարար Վու Հույ Հոանգն նոյեմբերի 6-ին ընդունել է Վիետնամում ՀՀ դեսպան Ռաիսա Վարդանյանին: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, ընդգծելով երկու երկրների միջև ձևավորված ջերմ և գործընկերային հարաբերություններն ու երկու ժողովուրդների բարեկամությունը՝ կողմերը շեշտել են տնտեսական կապերի խորացման և ամրապնդման անհրաժեշտությունը: Դեսպան Վարդանյանը նախարարին է ներկայացրել Հայաստանի տնտեսական կյանքի առանձնահատկությունները, տնտեսության ավանդական ճյուղերը, ինչպես նաև քննարկել է ներդրումային հնարավորություններն ու ներդրողների համար ստեղծված պայմանները: Դեսպանը Հույ Հոանգին է փոխանցել ՀՀ էկոնոմիկայի նախարար Կարեն Ճշմարիտյանի՝ Հայաստան այցելելու հրավերը:
Կողմերը քննարկել են տնտեսական ոլորտում համագործակցության օրակարգում առկա հարցերը՝ համագործակցությունը երկու երկրների առևտրաարդյունաբերական պալատների միջև, գործարար խորհրդի ստեղծումն ու երկու երկրների գործարարների մասնակցությամբ համաժողովի անցկացումը: Համագործակցության խթանման համար զրուցակիցներն ընդգծել են միջկառավարական հանձնաժողովի և իրավապայմանագրային դաշտի ստեղծման անհրաժեշտությունը:
Հույ Հոանգն իր հերթին հայտնել է վիետնամական կողմի պատրաստակամությունը` քայլեր ձեռնարկելու երկկողմ ապրանքաշրջանառության ծավալների մեծացման, ներդրումների խթանման, գործարար կապերի հաստատման ուղղությամբ՝ նշելով, որ վիետնամական սպառողներին քաջածանոթ են հայկական արտադրության մի շարք ապրանքատեսակներ: Գործարար կապերի խթանման նպատակով նախարարն առաջարկել է իրականացնել վիետնամցի գործարարների այց Հայաստան:
Կողմերը պայմանավորվել են սերտորեն համագործակցել քննարկված հարցերի շուտափույթ և արդյունավետ իրականացման հարցում: