Կառավարությունն ամբողջական փաթեթ է պատրաստում սահմանամերձ համայնքների օժանադակելու համար
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՊՐԵՍ: Սահմանամերձ համայնքների աջակցություն ցուցաբերելու նպատակով կառավարությունում վարչապետ Հովիկ Աբրահամյանի նախաձեռնությամբ ստեղծվել է աշխատանքային խումբ, որը կմշակի ամբողջական փաթեթ: «Արմենպրես»-ի փոխանցմամբ՝ ՀՀ փոխվարչապետ, տարածքային կառավարման նախարար Արմեն Գևորգյանը, ներկայացնելով Ազգային ժողովի պատգամավոր Նիկոլ Փաշինյանի սահմանամերձ համայնքներին օժանդակություն ցուցաբերելու օրենսդրական նախաձեռնությունը, նշեց, որ ստեղծված աշխատանքային խումբը կքննարկի դրանք:
«Աշխատանքային խումբն ամփոփում է բոլոր առաջարկությունները: Կլինի համատեղ ամբողջական փաթեթ, որի մեջ կլինեն ոչ միայն սոցիալական, այլև գործարարությանը վերաբերող հարցեր»,- ասաց փոխվարչապետը:
ՀՀ վարչապետն էլ ավելացրեց, որ սահմանամերձ համայնքներին օժանադակություն ցուցաբերելու հարցը կառավարության նախաձեռնությունն է, իսկ ԱԺ պատգամավորների ներկայացրած բոլոր առաջարկությունները կքննարկվեն ու ողջամիտները կներառվեն այդ փաստաթղթում:
Օրենսդրական նախաձեռնության կարգով Փաշինյանի ներկայացրած «Սահմանապահ համայնքների մասին» ՀՀ օրենքում լրացումներ կատարելու մասին» ՀՀ օրենքի նախագծի վերաբերյալ կառավարությունը ներկայացրել էր որոշակի առաջարկությունները: Մասնավորապես, վերնագրում և տեքստում «սահմանապահ» բառն առաջարկվում է փոխարինել «սահմանամերձ» բառով, քանի որ նախագծում խոսքը գնում է ոչ թե Հայաստանի Հանրապետության սահմանը պահպանելու հարցում համայնքներին լիազորություններ տալու, այլ սահմանից որոշակիհեռավորության վրա (մինչև 3 կմ) գտնվող համայնքներին արտոնություններ տրամադրելու մասին:
Նախագծի 2. 3-րդ հոդվածով նախատեսվում է, որ «սահմանապահ համայնքի բնակիչները ազատվում են Սահմանապահ համայնքի տարածքում ունեցած հողերի հողիհարկից և Սահմանապահ համայնքի տարածքում ունեցած անշարժ գույքի գույքահարկից»: Կառավարությունը գտնում է, որ այս դեպքում ավելի նպատակահարմար է կիրառել արդեն երկու տարի գործող ՀՀ որոշմամբ հաստատված «Մարտական գործողությունների հետևանքով չօգտագործվող և հակառակորդի կողմից գնդակոծման դեպքեր ունեցող Հայաստանի Հանրապետության սահմանամերձ համայնքների հողի հարկ վճարող ֆիզիկական և իրավաբանական անձանց և ջրօգտագործողների ընկերությունների սպասարկման տարածքում ընդգրկված այդ համայնքներում ոռոգման ջուր օգտագործող ֆիզիկական և իրավաբանական անձանց պետական աջակցություն ցուցաբերելու մասին» ծրագրում ամրագրված մոտեցումը՝ և հարկերի գումարները փոխհատուցվեն պետության կողմից, որպեսզի չնվազեն նաև այդ համայնքների սեփական եկամուտները,որոնց հաշվին ծառայություններ են ստանում համայնքի բնակիչները:
Ըստ գործադիր մարմնի՝ այս առաջարկությունը բխում է նաև Տեղական Ինքնակառավարման Եվրոպական Խարտիայի 9-րդ հոդվածի պահանջներից, համաձայն որոնց՝«տեղական ինքնակառավարման մարմինների ֆինանսական միջոցների առնվազն մի մասը պետք է գոյանա տեղական հարկերից և վճարներից, որոնց դրույքաչափերըտեղական ինքնակառավարման մարմինները իրավունք ունեն սահմանել օրենքի շրջանակներին համապատասխան:
Փաշինյանի նախագծի 3. 4-րդ հոդվածով նախատեսվում է, որ պետական բյուջեից ստացվող օգնությունը կարող է օգտագործվել բացառապես համայնքի բնակիչներիառողջապահական կարիքները հոգալու, ինչպես նաև երիտասարդ ընտանիքներին աջակցություն ցուցաբերելու համար: Առաջարկվում է այդ ցանկը լրացնել սոցիալական ևկրթական կարիքների դեպքերով:
«4. 7-րդ հոդվածով սահմանվում է. «Սահմանապահ համայնքներում և դրանց հարակից տարածքներում ականների պայթյունից, ադրբեջանական զինված ուժերիգործողությունների հետևանքով զոհված քաղաքացիների ընտանիքներին Հայաստանի Հանրապետության պետական բյուջեից տրվում է միանվագ օգնություն՝ 2 միլիոն դրամիչափով՝ հուղարկավորության ծախսերի համար:» Առաջարկում ենք հանել «հուղարկավորության ծախսերի համար» բառերը, քանի որ չեն բացառվում դեպքեր, երբ զոհվածներիընտանիքները ֆիզիկապես հուղարկավորություն կազմակերպելու հնարավորություն չունենան:
Ելնելով շարադրվածից՝ Հայաստանի Հանրապետության կառավարությունը ներկայացված օրենքի նախագիծն ընդունելի կհամարի իր կողմից ներկայացրած առաջարկությունների ընդունման դեպքում»,- ասված է կառավարության եզրակացության մեջ: