Աշխարհի լավագույն գինի է ճանաչվել հայկական «Մուսկատ»-ը
ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ։ Ֆրանսիայում անցկացված «Muscats du Monde» («Աշխարհի լավագույն Մուսկատները») միջազգային գինու մրցույթում հաղթող է ճանաչվել «Արմենիա» գինու գործարանի հայկական «Մուսկատ» գինին։ Ինչպես գրում է eurowine.com.ue կայքը, մրցույթն այս տարի անցկացվել է 13-րդ անգամ։
«Արմենպրես»-ի հաղորդմամբ՝ հայկական «Մուսկատ»-ը լավագույնն է ճանաչվել 224 տեսակի գինիների շարքում։ Մրցույթին մասնակցել են աշխարհի 24 երկրներից ժամանած պատվիրակություններ։ 55 միջազգային փորձագետներ երկու օր շարունակ համտեսել են ներկայացված գինիները։ Համտեսից հետո մասնակիցներին է հանձնվել 75 մեդալ։ Ոսկե մեդալ է շնորհվել 26 գինու, իսկ արծաթյա՝ 49-ին։
Հայկական «Մուսկատ» գինին հաղթող է ճանաչվել՝ առաջ անցնելով ֆրանսիական, ավստրիական, բրազիլական, պորտուգալական գինիներից։
«Մուսկատ»-ը վարդագույն, կիսաքաղցր գինի է՝ պատրաստված խաղողի Մուսկատ տեսակից: Գինին օժտված է սորտին բնորոշ յուրահատուկ բումունքով և համով: