Երևանի մի շարք փողոցներում տեղատարափ անձրևի հետևանքով փլուզումներ են տեղի ունեցել, ջրալցվել են շենք-շինություններ
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: Տեղատարափ անձրևի հետևանքով մայիսի 3-ի ժամը 23:45-ից մայիսի 4-ի ժամը 07։00-ն ընկած ժամանակահատվածում Երևանի մի շարք վարչական շրջաններում, մասնավորապես՝ Կենտրոն, Էրեբունի, Շենգավիթ, Դավթաշեն և Նոր Նորք վարչական շրջանների շենք-շինությունները, գրասենյակային տարածքները ջրալցվել են, եղել են փլուզումներ, տրանսպորտային միջոցներ են ջրի մեջ արգելափակվել ու խափանվել։
«Արմենպրես»-ն այս մասին տեղեկանում է Փրկարար ծառայության տարածած հաղորդագրությունից:
Նշվում է, որ քաղաքացիներից ստացված ահազանգների հետքերով փրկարարներն իրականացրել են ջրահեռացման և ավտոմեքենաների դուրս բերման աշխատանքներ։
Ըստ նախնական տվյալների՝ ջրալցումների հետևանքով զոհեր և տուժածներ չկան։