Հայկական ջազի կենդանի լեգենդ Լևոն Մալխասյանի հոբելյանական միջոցառումների մեկնարկն ազդարարվեց Գյումրիում
ԳՅՈՒՄՐԻ, 4 ՄԱՅԻՍԻ, ԱՐՄԵՆՊՐԵՍ: Գյումրու Վարդան Աճեմյանի անվան պետական դրամատիկական թատրոնում տեղի ունեցավ հայկական ջազի կենդանի լեգենդ Լևոն Մալխասյանի (Մալխաս) «Այ բալա, շուտով՝ 80» համերգը՝ «Մալխաս ջազ» բենդի և համերգի հատուկ հյուր՝ Գյումրու համայնքապետարանի «Անի» փողային նվագախմբի մասնակցությամբ։
Ինչպես տեղեկացնում է «Արմենպրես»-ը, կոմպոզիտոր, դաշնակահար, ՀՀ ժողովրդական արտիստ Լևոն Մալխասյանի ծննդյան առթիվ կազմակերպված համերգին ջազի երկրպագուները վայելեցին սիրված և նոր ջազային կատարումներ:
«Լևոն Մալխասյանը և՛ որպես երաժիշտ, և՛ որպես Ջազի Հայկական Ասոցիացիայի պատվավոր նախագահ մշտապես եղել է «Մանուկյան պրոդաքշն»-ի կողքին և նաև նրա շնորհիվ է, որ սիրվել ու գնահատվել է ոչ միայն «Ջազը եւ Գյումրին» նախագիծը, այլ նաև բոլորիդ սիրված «Հայաթ Ջազ»-ը»,- ողջունելով ջազի սիրահարներին՝ նշեց Գյումրու Մշակույթի և երիտասարդության հարցերի բաժնի պետ Լիլիթ Թովմասյանը՝ ուրախությամբ հավելելով, որ հայտնի ջազմենի հոբելյանական միջոցառումների մեկնարկն ազդարարվում է Գյումրիում՝ այս համերգով։
Սիրված ջազմենը ոչ միայն մեծ ներդրում ունի հայկական ջազի զարգացան, այլ նաև Գյումրիում ջազային ավանդույթները շարունակելու ու Գյումրիում երաժշտասերներին ջազային հրաշալի համերգներ նվիրելու գործում. նա մշտապես եղել է Գյումրիում անցկացվող «Ջազը եւ Գյումրին» և «Հայաթ Ջազ»-ի կողքին։
Երեկոյի ընթացքում Գյումրի համայնքի ղեկավար Վարդգես Սամսոնյանի կողմից, Գյումրում ջազային երաժշտության տարածման գործում ներդրած ավանդի, տարիների արդյունավետ փոխգործակցության ու Գյումրիի մշակութային կյանքի ակտիվությանը նպաստելու համար «Մալխաս ջազ» բենդը պարգևատրվեց պատվոգրով:
Արմենուհի Մխոյան