1 րոպեի ընթերցում
ԵՐԵՎԱՆ, 26 ՀՈՒԼԻՍԻ, ԱՐՄԵՆՊՐԵՍ: Հայաստանի ազգային հավաքականի կիսապաշտպան Արազ Օզբիլիսը, ով «Կուբան»-ից տեղափոխվել է Մոսկվայի «Սպարտակ», նոր ակումբում տարեկան 1.5 միլիոն եվրո աշխատավարձ կստանա: «Արմենպրես»-ի հաղորդմամբ՝ այս մասին տեղեկացնում է championat.com-ը:
Ավելի վաղ հաղորդվել էր, որ Արազ Օզբիլիսը 5 տարվա պայմանագիր է կնքել «Սպարտակ»-ի հետ եւ հանդես կգա 11 համարի մարզաշապիկով:
Արազ Օզբիլիսը Կրասնոդարի «Կուբան»-ի կազմում մասնակցել է Ռուսաստանի պրեմիեր լիգայի 24 հանդիպման՝ դառնալով 11 գոլի հեղինակ: Ռուսաստանի առաջնությունում խփած գնդակներից երկուսը նա ուղարկել է հենց իր ներկայիս թիմի դարպասը: Հայաստանի ազգային հավաքականում Օզբիլիսը մասնակցել է 10 խաղի եւ դարձել 3 գոլի հեղինակ: Նա «Կուբան» էր տեղափոխվել հոլանդաական «Այաքս» ակումբից: