Գաֆեսճեան արվեստի կենտրոնում կկայանա «Հարություն Կալենց. գունապնակի հակառակ կողմը» խորագրով միջոցառում
1 րոպեի ընթերցում
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: Գաֆէսճեան արվեստի կենտրոնի «Հանդիպում արվեստի հետ» շարքի շրջանակներում կկայանա «Հարություն Կալենց. գունապնակի հակառակ կողմը» խորագրով միջոցառումը: Ինչպես «Արմենպրես»-ին տեղեկացրին Գաֆէսճեան արվեստի կենտրոնի հանրային կապերի եւ մարքեթինգի ծառայությունից,
այն նվիրված է հայ մեծանուն գեղանկարիչ Հարություն Կալենցի արվեստին և Գաֆէսճեան արվեստի կենտրոնի նորաբաց «Հարություն Կալենց. գույնը ձևի մեջ» ցուցադրությանը, որը ներկայացնում է գեղանկարչական և գրաֆիկական աշխատանքների ընտրանի «Կալենց» թանգարանից: Ծրագրի շրջանակներում ԳԱԿ հանրային ծրագրերի գծով փոխտնօրենի համադրող-օգնական, արվեստագիտության թեկնածու Արմեն Եսայանցը հանդես կգա«Հարություն Կալենց. գունապնակի հակառակ կողմը» թեմայով ելույթով:
Միջոցառման մուտքն անվճար է` նախնական գրանցմամբ: «Հանդիպում արվեստի հետ» միջոցառումների շարքը մեկնարկել է Գաֆէսճեան արվեստի կենտրոնում 2010թ. հոկտեմբերից: Ամեն ամիս կազմակերպվող այս միջոցառումները նվիրված են հայ և համաշխարհային արվեստագետներին և մշակութային կարևորագույն իրադարձություններին: Միջոցառման գործընկներն է «Արմենիա Վայն» ընկերությունը: