ԱՄՆ Հայ դատի հանձնախումբը միանում է մարդկության դեմ հանցագործություններին նպաստող երկրների ընկերություններում ներդրումները բացառելուն
2 րոպեի ընթերցում
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ:ԱՄՆ Հայ դատի հանձնախմբի Արեւելյան շրջանի ներկայացուցիչները միացել են «Ներդրումներ Ցեղասպանության դեմ» ընկերությանը եւ մասնակցել ամերիկյան խոշոր ներդրող հանդիսացող Fidelity հիմնադրամի բաժնետերերի հետ հանդիպմանը:
«Արմենպրես»-ի հաղորդմամբ՝ հանդիպման ժամանակ քննարկվել է ցեղասպանություններին եւ մարդկության դեմ հանցագործություններին նպաստող ռեժիմներին օգնող ընկերություններում ներդրումներից խուսափելու հարցը:
Հիմնադրամի բաժնետերերի հետ հանդիպմանը մասնակցել են Հայ դատի հանձնախմբի Արեւելյան շրջանի գործադիր տնօրեն Միշել Հակոբյանը եւ Հայ դատի ակտիվիստ Տիգրան Կալիգյանը:
Հանդիպման ժամանակ բաժնետերերը պահանջել են, որպեսզի հիմնադրամի ղեկավարող խորհուրդը թափանցիկ ընթացակարգեր իրականացնի՝ ցեղասպանություններին եւ մարդկության դեմ հանցագործություններին նպաստող երկրների ընկերություններում ներդրումները բացառելու համար:
Հայ դատի հանձնախմբի Արեւելյան շրջանի գործադիր տնօրեն Միշել Հակոբյանի խոսքով` Fidelity-ի բաժնետերերի հետ հանդիպումը ցույց է տվել, որ միլիոնավոր ամերիկացիներ ցանկանում են ներդրումներ անել այն ընկերություններում, որոնք կապված չեն ցեղասպանությունների հետ: «ԱՄՆ Հայ դատի հանձնախումբը եւ «Ներդրումներ ցեղասպանության դեմ» ընկերությունն իրենց գործունեությանը միջազգային ուղղվածություն կհաղորդեն՝ հանցավոր ռեժիմներին հատկացվող ֆինանսական աջակցությանը վերջ տալու համար»,-ասել է նա:
ԱՄՆ դաշնային օրենքը նավթային ընկերություններին եւ շատ այլ ընկերությունների արգելում է գործել Սուդանում: Որոշումը մեկնաբանվում է նրանով, որ Fidelitiy-ն եւ ամերիկյան շատ այլ ֆինանսական կառույցներ արտասահմանյան շատ նավթային ըկերություններում խոշոր ներդրումներ են անում, որոնք էլ իրենց հերթին ներդրումներ են անում Սուդանում` անուղղակիորեն օգնելով այդ երկրի կառավարությանը կողմից իրականացվող ցեղասպանությանը: