Մորնինգսթարն ապշած է, թե ինչու է Բաքուն սահմանափակում ադրբեջանցի ուսանողների կրթությունն ԱՄՆ-ում

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Բաքվում ԱՄՆ դեսպան Ռիչարդ Մորնինգսթարը հայտարարել է, որ չի հասկանում, թե ինչու է Ադրբեջանի կառավարությունը սահմանափակում ադրբեջանցի ուսանողների կրթությունը ԱՄՆ-ում: Այս մասին, ինչպես հաղորդում է «Արմենպրես»-ը, ամերիկացի դեսպանն ասել է «Ազադլըգ» թերթին տված հարցազրույցում:

«Ազնվորեն խոստովանած` մենք չենք հասկանում` ինչ է կատարվում: Չեմ հասկանում` ինչու ԲՈւՀ-երի ցուցակը, որտեղ կարող են սովորել ուսանողները պետության հաշվին, 82-ից կրճատել են մինչեւ 3-ի: Առաջիկայում ես կհանդիպեմ կրթության նախարարին: ԱՄՆ-ի շատ համալսարաններ ադրբեջանցի ուսանողներին որակյալ կրթություն են առաջարկում: Ես հավատում եմ, որ փոխանակման տվյալ ծրագիրը կարող է օժանդակել ԱՄՆ-ի կողմից Ադրբեջանի, Ադրբեջանի կողմից էլ ԱՄՆ-ի հետազոտմանը: Ես չեմ հասկանում, թե ինչու են նման քայլերը սահմանափակվում», -ասել է Մորնինգսթարը: