Իրանի դեսպանությունն իր նկատառումներն է հայտնում իր երկրի և ՀՀ-ի հարաբերությունների վերաբերյալ ԱՄՆ դեսպանի խոսքերի մասին
3 րոպեի ընթերցում
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Բարիդրացիության, ազգային ու տնտեսական շահերի ապահովման և երկկողմ տնտեսական բազմաբնույթ պայմանագրերի կնքման վրա հիմնված Իրանի Իսլամական Հանրապետության և Հայաստանի Հանրապետության հարաբերությունները մշտապես վերընթաց զարգացում են ունեցել և չեն ենթարկվել տարածաշրջանից դուրս գտնվող երրորդ երկրների ներշնչանքի և հայտարարության ազդեցությանը: Այդ մասին նշված է «Ամենպրես»-ին տրամադրված ՀՀ-ում Իրանի դեսպանության հայտարարության մեջ:
Դրանում, մասնավորապես, նշված է. «Իրանի` միջուկային էներգիայի խաղաղ օգտագործման հարցում իր անվիճելի իրավունքը պնդելու պատրվակով ԱՄՆ և որոշ արևմտյան երկրների անօրինական և միակողմանի պատժամիջոցները երբեք չեն ազդել երկու երկրների պայմանագրերի և պարտավորությունների վրա:
Բացի դրանից` Հայաստանի Հանրապետության կառավարությունն ու ժողովուրդը լարված և դժվարին պահերին Իրանի անշահախնդիր աջակցության ականատեսն են եղել: ԱՄՆ դեսպանը, խոստովանելով այդ խնդիրները, իր օրակարգում ներառել է Հայաստանի Հանրապետության իշխանությունների վրա ճնշում գործադրելու քաղաքականությունը, մոռանալով, որ երկու բարեկամ ու հարևան երկրների հարաբերությունները չեն ենթարկվի նման ինտերվենցիոնիստական հայտարարությունների ազդեցությանը:
Քանի որ Իրանի Իսլամական Հանրապետությունը մշտապես եղել է Հայաստանի հարգարժան կառավարության ու ժողովրդի կողքին, պատրաստ է, հաշվի առնելով էներգակիրների գների բարձրացումից բխող դժվարությունները, տնտեսական և հատկապես էներգետիկ ոլորտում համագործակցության ընդլայնման միջոցով նպաստել Հայաստանի էներգետիկ անվտանգության ապահովմանը և էներգետիկ աղբյուրների բազմազանեցմանը:
Մեղրիի ՀԷԿ-ի նախագծին արագություն հաղորդելով և վերականգնվող մյուս էներգետիկ աղբյուրների ոլորտներում նմանատիպ նախագծեր մշակելով հնարավոր է հասնել դրան: Ուստի այդ բնագավառում Իրանի գիտական ու գործնական փորձը, ինչպես նաև բնատուր առատ պաշարները (ջրի, քամու և արևի) հնարավոր են դարձնում Հայաստանի էներգետիկ անվտանգության ապահովումը:
Իրանի դեսպանությունը միջուկային ծրագրի առնչությամբ ԱՄՆ անհիմն մեղադրանքները պարզաբանելու, ինչպես նաև տարածաշրջանային ու միջազգային խնդիրների շուրջ իր սկզբունքային քաղաքականությունը ներկայացնելու նպատակով առաջիկայում կհրավիրի մամուլի ասուլիս»: