Հայրիկյանի մահափորձի գործով կան ձերբակալվածներ /լրացվում է/

ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: ՀՀ նախագահի թեկնածու, «Ազգային ինքնորոշում միավորում» կուսակցության առաջնորդ Պարույր Հայրիկյանի մահափորձի գործովկան ձերբակալվածներ:

Այսօր գործի բացահայտման մասին ակնարկել էր նաեւ Հայրիկյանը facebook-յան իր էջում կատարած գրառմամբ:

Պարույր Հայրիկյանի նախընտրական շտաբը, սակայն, այդ առնչությամբ լռություն է պահպանում:«Մենք ոչ մի տեղեկություն չունենք, մեզ ոչինչ հայտնի չէ»,-«Արմենպրես»-ի հետ զրույցում ասաց նախագահի թեկնածու Պարույր Հայրիկյանի նախընտրական շտաբի համակարգող Մանյա Այվազյանը:

Հունվարի 31-ին, ժամը 23.20-ի սահմաններում, Տպագրիչների փողոցի թիվ 9 շենքի բակում անհայտ անձը հրազենից կրակ է արձակել ՀՀ Նախագահի թեկնածու Պարույր Հայրիկյանի վրա` աջ անրակի շրջանում պատճառելով հրազենային վնասվածք: Հայրիկյանը տեղափոխվել է «Սուրբ Գրիգոր Լուսավորիչ» բժշկական կենտրոն: Հայրիկյանին վիրահատել են փետրվարի 1-ին եւ մարմնից հանել են գնդակը: Նրա վիրահատության կարերը կքանդվեն վիրահատությունից մոտ մեկ շաբաթ անց: Թեկնածուն արդեն հիվանդասենյակում է:

Փաստի առթիվ հարուցվել է քրեական գործ ՀՀ քրեական օրենսգրքի 34-305 հոդվածի հատկանիշներով (պետական, քաղաքական կամ հասարակական գործչի սպանության փորձ): Ձեռնարկվում են անհրաժեշտ օպերատիվ-հետախուզական և քննչական միջոցառումներ հանցագործություն կատարած անձի ինքնությունը պարզելու և նրան հայտանաբերելու ուղղությամբ: Քննությունը վարում է ՀՀ ԱԱԾ քննչական վարչությունը, մշակվել են աշխատանքային մի քանի վարկածներ: