Կալտենբախը Ֆրանսիայում Ցեղասպանության ժխտումը քրեականացնող օրենքը ցանկանում է ընդունված տեսնել ապրիլի 24-ին ընդառաջ
2 րոպեի ընթերցում
ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ:Ֆրանսիայի Սենատի Ֆրանսիա-Հայաստան բարեկամության խմբի նախագահ Ֆիլիպ Կալտենբախն ընդունել է Ֆրանսահայ ընկերակցությունների համակարգող խորհրդի պատվիրակությանը: Հանդիպմանը մասնակցել են նաեւ մի շարք սենատորներ: Քննարկման առանցքում Հայոց ցեղասպանության ժխտումը քրեականացնող նոր օրինագծի մշակման, նաեւ ՀՀ Նախագահ Սերժ Սարգսյանի` Ֆրանսիա, Հայաստանի խորհրդարանականների` Փարիզ այցելության հարցերն են եղել: Ինչպես հաղորդում է «Արմենպրես»-ը` վկայակոչելով Ֆրանսիայում լույս տեսնող «Նոր հառաչ» պարբերականը, համակարգող խորհրդի համանախագահները` Մուրադ Փափազյանը եւ Արա Թորանյանը, մեկ անգամ եւս ընդգծել են նախագահ Օլանդի` Ցեղասպանության ժխտման պատժելիության մասին օրենքի ընդունման հանձնառությունը:
Ֆիլիփ Կալտենբախի խոսքով` Ֆրանսիա-Հայաստան բարեկամության խումբը ցանկանում է օրենքն ընդունված տեսնել հնարավորինս շուտ` 2013թ. ապրիլի 24-ին ընդառաջ: Նա նշել է, որ այս անգամ հարկավոր է նախապես մեծ ուշադրություն հատկացնել իրավական եւ քաղաքական բոլոր պայմաններին, որպեսզի օրինագծի հաջողությունն ապահովված լինի:
Ֆրանսիայի Ազգային ժողովը` 2011թ. դեկտեմբերի 22-ին, իսկ Սենատը` 2012թ. հունվարի 24-ին ընդունեցին Հայոց ցեղասպանության ժխտման պատժելիության օրինագիծը, որը նախագահ Նիկոլա Սարկոզիի վավերացմանը ներկայացվելուց առաջ մի խումբ թուրքամետ պատգամավորների ջանքերով ներկայացվեց Սահմանադրական դատարան եւ համարվեց հակասահմանադրական: