3 րոպեի ընթերցում
ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ:«Ժառանգություն» կուսակցության փոխնախագահ Արմեն Մարտիրոսյանն աջակցում է Սաֆարովի արտահանձնման հետ կապված ՀՀ Նախագահ Սերժ Սարգսյանի որդեգրած կոշտ դիրքորոշմանը:«Արմենպրես»-ի փոխանցմամբ, սեպտեմբերի 7-ին լրագրողների հետ հանդիպմանը «Ժառանգության» ներկայացուցիչնանդրադարձավ Հունգարիայի կողմից ոճրագործ սպա Ռամիլ Սաֆարովին արտահանձնելու խնդրին եւ դրա հնարավոր զարգացումներին: «Արդեն պարզ է, որ Ադրբեջանը երբևիցե չի հրաժարվելու հայերի հանդեպ հաշվեհարդար տեսնելուց, թշնամական մթնոլորտից: Լեռնային Ղարաբաղի անկախության ճանաչումն այն ճանապարհն է, որը հնարավորություն է տալու Հայաստանին շարունակել պաշտպանելու իր ազգային շահերը»,- ասաց նա:
Անդրադառնալով ներքաղաքական զարգացումներին` «Ժառանգության» փոխնախագահն այդ համատեքստում խիստ կարևորեց առաջիկա նախագահական ընտրությունները: «Չնայած սեպտեմբերին կայանալու են Տեղական ինքնակառավարման մարմինների ընտրություններ, սակայն բոլորս էլ քաջ գիտակցում ենք, որ համապետական ընտրությունները շատ ավելի կարևոր են»,-ասաց նա:Մարտիրոսյանը կարծում է, որ Րաֆֆի Հովաննիսյանը կմասնակցի նախագահի ընտրություններին, բայց համոզված չէ` արդյոք նա հանդես կգա որպես ընդդիմության միասնական թեկնածու, թե ոչ: «Հնարավոր է, որ այլ թեկնածուներ եւս լինեն, բայց ես չեմ կարծում, որ դա «Ժառանգության» պայքարի վրա մեծ ազդեցություն կունենա»,-ասաց Մարտիրոսյանը:Հայաստանում նախագահի ընտրությունները տեղի կունենան 2013 թվականի փետրվարին:
Ոճրագործ Ռամիլ Սաֆարովը 2004թ. փետրվարի 19-ին Բուդապեշտում ՆԱՏՕ-ի դասընթացների մասնակցող հայ սպային քնած ժամանակ կացնահարելուց հետո դատապարտվել է ցմահ ազատազրկման 30 տարի առանց ներման իրավունքի: 2012թ. օգոստոսի 31-ին Սաֆարովը Հունգարիայի կողմից էքստրադիցիայի է ենթարկվել Ադրբեջան և նույն օրը ներման արժանացել այդ երկրի կողմից` չնայած խոստումներին, որ ոճրագործը կշարունակի պատժի կրումը: Հայաստանը կասեցրել է դիվանագիտական հարաբերությունները Հունգարիայի հետ: Միջազգային հանրությունը Ադրբեջանի` միջազգային իրավական նորմերին հակասող քայլի դատապարտման հայտարարություններով է հանդես գալիս: Հունգարիան մեղադրել է Ադրբեջանին` խոստումը դրժելու մեջ: