Նիլ Արմսթրոնգին կթաղեն ծովում

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: Աստղանավորդ Նիլ Արմսթրոնգին կթաղեն ծովում: Այդ մասին, ինչպես տեղեկացնում է «Արմենպրես»-ը, հաղորդել է Agence France-Presse-ը` հղում անելով հանգուցյալի ընտանիքի մամուլի քարտուղար Ռիկ Միլլերին:

Նա նշել է, որ արարողությունը, ինչպես սպասվում է, կլինի փակ եւ տեղի կունենա սեպտեմբերի 13-ին նախատեսված հրաժեշտից հետո:

Առաջիկա հուղարկավորության այլ մանրամասներ Միլլերը չի հաղորդել:

Արարողությանը, որը սեպտեմբերի 13-ին կկայանա Վաշինգտոնի մայր տաճարում, կմասնակցեն NASA-ի ղեկավար Չարլզ Բոլդենը, նախկին եւ գործող աստղանավորդներ:

Նիլ Արմսթրոնգը մահացել է օգոստոսի 25-ին 82 տարեկան հասակում:

Նա պատմության մեջ առաջինն Է ոտք դրել լուսնի մակերեւույթին: Դա տեղի է ունեցել 1969 թվականի հուլիսի 20-ին: