Հայաստանն ու Թուրքմենստանը ձգտում են կրկնապատկել ապրանքաշրջանառությունը

ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի և Թուրքմենստանի միջև տնտեսական համագործակցության միջկառավարական հանձնաժողովի չորրորդ նիստն անցկացվում է Երեւանում: Նիստին մասնակցելու համար սեպտեմբերի 5-7-ը Երևան է ժամանել թուրքմենական պատվիրակությունը` Թուրքմենստանի փոխվարչապետ Սապարդուրդի Տոյլիևի գլխավորությամբ:

Միջկառավարական հանձնաժողովի` Կառավարության ընդունելությունների տանն անցկացվող նիստը բացելով` հայկական կողմի համանախագահ, ՀՀ էներգետիկայի և բնական պաշարների նախարար Արմեն Մովսիսյանը նշեց. «Այս տարի լրանում է Հայաստանի և Թուրքմենստանի միջև դիվանագիտական հարաբերությունների հաստատման 20 ամյակը, և այդ տարիներն անց են կացել երկկողմ բարեկամության և փոխըմբռնման շրջանակներում: Կարևորում եմ մասնավորապես տնտեսական և հումանիտար զարգացման ծրագրերի ընդլայնման նշանակությունը»: Նախարարի խոսքով` Հայաստանն ու Թուրքմենստանը միշտ էլ նույնանման մոտեցում են ցուցաբերել տարածաշրջանային հարցերին, և փոխկապակցված համագործակցել են միջազգային տարբեր ատյաններում: Սակայն, համատեղ տնտեսական կապերը դեռևս ընդլայման տեղ ունեն, և բացահայտված չէ երկկողմ առևտրատնտեսական հարաբերությունների ողջ պոտենցիալը: Այս առումով անելիքները բավական շատ են:

Թուրքմենական կողմի համանախագահ, Թուրքմենստանի փոխվարչապետ Սապուրդուդի Տոյլիև շնորհակալություն հայտնեց հայկական կողմին բարեկամական ընդունելության և ջերմ վերաբերմունքի համար: Հայաստանի և Թուրքմենստանի հարաբերությունները միշտ էլ ջերմ են եղել: Միջկառավարական այս հանդիպումն էլ միտված է այդ հարաբերությունները խորացնելու և առևտրատնտեսական ոլորտում նոր ձեռքբերումներ գրանցելու համար: Փոխվարչապետի տեղեկացմամբ` անցյալ տարվա տվյալներով Հայաստանի և Թուրքմենստանի առևտաշրջանառությունը կազմել է 28,8 մլն դոլար, որը բավական քիչ է, և պետք է ձգտել կրկնապատկել ու եռապատկել այդ ցուցանիշը: Համագործակցության լավ նախադրյալներ կան ագրարային, սննդամթերքի արտադրության, մշակույթային և գիտակրթական ոլորոտներում: Հայաստանը Թուրքմենստանից ներմուծում է հիմնականում տեքստիլ և թեթև արդյունաբերության համար հումք, իսկ հակառակ ուղղությամբ գալիս են արդյունաբերական տարբեր սարքավորումներ և տեխնոլագիական մշակումներ: Հայաստանն ու Թուրքմենստանն Իրանի միջոցով անց են կացնում հոսանքի փոխանակում: Երկկողմ գիտակրթական լավ հարաբերություններ ունեն Աշխաբադի և Երևանի պետական համալսարանները: «Հուսով ենք, հաջորդ նիստի ժամանակ, որն անցկացվելու է 2013թ. Աշխաբադում, ներկայումս քննարկվող հարցերից շատերը իրագործման փուլում կլինեն»,-ասաց Տոյլիևը:

Հայաստանի և Թուրքմենստանի միջկառավարական հանձնաժողովի նիստի ընթացքում քննարկվելու են երկու երկրների միջև իրավապայմանագրային դաշտի զարգացմանը վերաբերող խնդիրները, ինչպես նաև ստանդարտացման և պետական վերահսկողության, վառելիքաէներգետիկ, տրանսպորտի և կապի, առողջապահության, գյուղատնտեսության ոլորտներում, կրթության և գիտության, ինչպես նաև մշակույթային-հումանիտար բնագավառներում համագործակցության հարցերը: Մասնավերապես քննարկվելում են թուրքմենական բամբակյա թելերը, տեքստիլ արտադրանքը Հայաստան ներմուծելու, ինչպես նաև Հայաստանում բարձր տեխնոլոգիաների զարգացման առաջատար փորձը`Թուրքմենստանում կիրառելու հնարավորությունները: Նիստի ավարտին ստորագրվելու է Հայաստանի Հանրապետության և Թուրքմենստանի միջև տնտեսական համագործակցության միջկառավարական հանձնաժողովի չորրորդ նիստի արձանագրությունը: