2 րոպեի ընթերցում
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Բարաք Օբաման պաշտոնապես ԱՄՆ-ի նախագահի պաշտոնի համար դեմոկրատների թեկնածու Է հաստատվել նոյեմբերին կայանալիք ընդհանուր ընտրություններում: Թեկնածուին պաշտպանել են Շառլոտում (Հյուսիսային Կարոլինայի նահանգ) ընթացող Դեմոկրատական կուսակցության ազգային համագումարի պատվիրակները՝ թվով 2931 մարդ անհրաժեշտ նվազագույն 2778-ի դեպքում, հաղորդում Է «Արմենպրես»-ը:
Օբամային որպես կուսակցության թեկնածու հաստատելու առաջարկությամբ համաժողովի մասնակիցներին դիմել Էր ԱՄՆ-ի նախկին նախագահ Բիլ Քլինթոնը, որը հանդես Է եկել Սպիտակ տան ներկայիս տիրոջ տնտեսական քաղաքականության աջակցությանն ուղղված համոզիչ ճառով:
Քլինթոնը հայտարարել Է, որ Օբաման կարողացավ տնտեսությունը վերադարձնել «վերականգնման ուղի»: Բացի այդ, նա «հիմք դրեց առավել ժամանակակից, առավել հավասարակշռված տնտեսական իրադրության ստեղծմանը, որը կապահովի միլիոնավոր նոր աշխատատեղեր», համոզված Է ԱՄՆ-ի նախկին նախագահը:
Նրա ելույթի ավարտվելուն պես կուլիսներից բեմ Է դուրս եկել Օբաման, որին հավաքվածները դիմավորել են խլացուցիչ ծափահարություններով: Գործող նախագահը, հակառակ նախկին պլանների, եկել Էր համագումարին, որպեսզի ունկնդրի Դեմոկրատական կուսակցության ավագանու ներկայացուցիչներից մեկին, որը մինչ այժմ հսկայական ժողովրդականություն Է վայելում հայրենակիցների շրջանում:
Դրանից հետո «Թայմ-Ուոռներ քեյբլ արենա» մարզահամալիրում, որտեղ ընթանում Է համագումարը, անցկացվել Է քվեարկությունը: Այսօր՝ համագումարի եզրափակիչ օրը, նրա մասնակիցների առջեւ ելույթ կունենա Բարաք Օբաման: Նա իր համաձայնությունը կտա որպես կուսակցության թեկնածու քվեարկվելու նախագահական ընտրություններում եւ կշարադրի երկրի հետագա զարգացման իր տեսլականը: