1 րոպեի ընթերցում
ԳՅՈՒՄՐԻ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 5-ին Գյումրիից մեկնարկեց Գյումրի-Երեւան հնգօրյա քայլարշավն ընդդեմ գենդերային բռնության:
Ակցիայի կազմակերպիչները՝ «Կանանց ռեսուրսային կենտրոն» կազմակերպության անդամները, նպատակ ունեն Գյումրիից հասնել հանրապետության մի շարք քաղաքային եւ գյուղական համայնքեր եւ կազմակերպել հանդիպումներ ազգաբնակչության հետ՝ վերհանելով գենդերային խնդրի կարեւորությունը: Այսօր այս մասին լրագրողների հետ ունեցած հանդիպման ժամանակ նշեցին քայլարշավի կազմակերպիչները:
«Բռնության դեպքերի մասին ահազանգերի մեծամասնությունը ստացվում է ՀՀ գյուղական համայնքներից: Իրազեկման բարձրացումը կարեւոր քայլ է գենդերային բռնության հիմնախնդիրների լուծման համար: Շատ գյուղական համայնքներում բնակվող կանայք մինչ օրս չգիտեն իրենց համար հասանելի ռեսուրսների առկայության մասին, որոնք կարող են իրենց օգնել` պաշտպանվել»,-նշեց Կանանց ռեսուրսային կենտրոնի նախագահ Լարա Ահարոնյանը: