Եվրահանձնաժողովը պահանջել Է ԵՄ-ի ընկերությունների ղեկավար կազմում կանանց թիվը հասցնել 40 տոկոսի
2 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Եվրամիության այն ընկերությունները, որոնց բաժնետոմսերը գնանշվում են ֆոնդային սակարաններում, պարտավոր են մինչեւ 2020 թվականն իրենց ղեկավար կազմում կանանց թիվն ավելացնել մինչեւ 40 տոկոս: Հակառակ դեպքում նրանց տուգանքներ են սպառնում: Համապատասխան օրենսդրությունը մշակված Է Եվրահանձնաժողովի կողմից եւ եկող ամսին ներկայացվելու Է Եվրամիության երկրների հաստատմանը: Այդ մասին, ինչպես տեղեկացնում Է «Արմենպրես»-ը, սեպտեմբերի 4-ին հաղորդել Է «Ֆայնենշլ թայմս» թերթը:
«Այսօրվա դրությամբ առաջատար եվրոպական ընկերությունների տնօրենների խորհուրդներում կանանց բաժին Է ընկնում տեղերի միայն 13,7 տոկոսը,-նշել Է հրատարակությունը:-Այս վիճակը պետք Է արմատապես փոխվի մինչեւ ընթացիկ տասնամյակի վերջը»:
Մի շարք երկրներ, ներառյալ Ֆրանսիան, Իտալիան, Իսպանիան եւ Նիդեռլանդները, այս նորման արդեն ներառել են իրենց ազգային օրենսդրության մեջ: «Սակայն մի շարք պետություններ, այդ թվում՝ Մեծ Բրիտանիան եւ Շվեդիան, մերժում են այսօրինակ մոտեցումը հանրային ընկերությունների կառավարման վերին օղակներում բաժնաչափերի սահմանման նկատմամբ»,-ընդգծում Է հրապարակությունը:
Նորման հաստատելու համար անհրաժեշտ Է Եվրամիության անդամ երկրների ձայների պարզ մեծամասնությունը, ինչը փաստորեն երաշխավորում Է դրա ընդունումը: «Ոչ Մեծ Բրիտանիան, ոչ Էլ Շվեդիան չեն կարողանա օգտվել վետոյի իրավունքից»,-նշում Է թերթը: Պատրաստված նախագծի համաձայն՝ ԵՄ-ի բոլոր այն ընկերությունները, որոնց աշխատողների թիվը 250 Է կամ ավելի, իսկ տարեկան եկամուտը՝ 50 մլն եվրո, պարտավոր կլինեն տարեկան հաշվետվության մեջ մատնանշել տնօրենների խորհուրդների կազմում կանանց եւ տղամարդկանց հարաբերակցությունը: Օրինախախտները կզրկվեն պետական պարտավորագրերից: