2 րոպեի ընթերցում
ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի նախագահի աշխատակազմը պատասխանել է Ռամիլ Սաֆարովին Հունգարիայից արտահանձնման եւ Ադրբեջանի նախագահի կողմից ներում շնորհելու վերաբերյալ ԱՄՆ ազգային անվտանգության մամուլի ծառայության օգոստոսի 31-ին արած հայտարարությանը, որտեղ Հունգարիայից եւ Ադրբեջանից պահանջել է բացատրություններ տալ հայ սպա Գուրգեն Մարգարյանին կացնով սպանած Ռամիլ Սաֆարովին արտահանձնելու եւ ներում շնորհելու առնչությամբ:
Ինչպես հաղորդում է «Արմենպրես»-ը` վկայակոչելով SalamNews-ը, Ադրբեջանի նախագահի աշխատակազմի իրավապահ մարմինների հետ աշխատանքների գծով բաժնի ղեկավար Ֆուադ Ալեսգերովն այդ կապակցությամբ հայտարարել է, որ Ռամիլ Սաֆարովի արտահանձնման հարցում եւ Հունգարիան, եւ Ադրբեջանը առաջնորդվել են դատապարտյալների արտահանձնման վերաբերյալ 1983 թ-ին ընդունված Եվրոպական կոնվենցիայի դրույթներով:
Սաֆարովին ներում շնորհելու հարցի հետ կապված Ալեսգերովը նշել է, որ հունգարական դատարանի կողմից կայացված վճիռը սահմանափակել է միայն վճռի ընդունման պահից 30 տարվա ընթացքում դատապարտյալին ազատ արձակելու հնարավորությունը` հավելելով, որ այդ սահմանափակումը չի տարածվում դատապարտյալին ներում շնորհելու կամ համաներման հնարավորության վրա:
Ալեսգերովը հայտարարել է, որ Սաֆարովին ներում է շնորհվել Ադրբեջանի օրեսնդրությանը համապատասխան: Նա «հավաստել» է, որ Ադրբեջանում պատիժը կրելու համար Հունգարիայի կողմից արտահանձնման գործառույթն, ինչպես նաեւ նրա հետագա ներումն ու ազատումն ամբողջությամբ համապատասխանել է դատապարտյալների արտահանձնման մասին Եվրոպական կոնվենցիային եւ Ադրբեջանի ներքին օրենսդրությանը: