2 րոպեի ընթերցում
ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Պաշտոնական Անկարան պատրաստակամություն է հայտնել անհրաժեշտության դեպքում հյուրընկալել Սիրիան լքող հայերին: Ինչպես հաղրոդում է «Արմենպրես»-ը` վկայակոչելով թուրքական Star պարբերականը, այս մասին լրագրողների հետ զրույցում հայտարարել է Թուրքիայի արտաքին գործերի նախարար Ահմեդ Դավութօղլուն:
Թուրքիայի ԱԳ նախարարը, խոսելով Սիրիայից փախստականների հոսքի մասին, նշել է, որ Թուրքիայի դռները բաց են բոլորի համար` անկախ դավանանքից: Լրագրողներից մեկի այն հարցին, թե արդյոք խոսքը վերաբերվում է նաև 1915 թվականի իրադարձություններից հետո Սիրիա տեղափոխված հայերի սերունդներին, Դավութօղլուն պատասխանել է. «Նման իրադրության պայմաններում մոռացվում է ամեն բան, անգամ 1915 թվականը: Թող այսօր էլ գան, ով ուզում է լինի, մեր դռները բաց են նրանց առաջ»:
Միևնույն հարցազրույցից մեկ այլ հատված էլ ներկայացրել է ադրբեջանական Trend լրատվական գործակալությունը: «Մենք ցանկանում ենք, որպեսզի Հայաստանի և Ադրբեջանի միջև բանակցություններն ընթանան Ստամբուլում»,- այսպես է Դավութօղլուին մեջբերել Trend-ը:
Նշենք, որ Լեռնային Ղարաբաղի հակամարտության կարգավորման շուրջ բանակցություններն ընթանում են ԵԱՀԿ Մինսկի խմբի շրչջանակններում, որի համանախագահող երկրներն են Ռուսաստանը, Ֆրանսիան և ԱՄՆ-ն: