Հռիփսիմե Խուրշուդյանը դարձավ Օլիմպիական խաղերի բրոնզե մեդալակիր

ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: Լոնդոնի օլիմպիական խաղերում ծանրամարտի կանանց +75 կգ քաշային կարգի մրցաշարում Հայաստանի ներկայացուցիչ Հռիփսիմե Խուրշուդյանը նվաճեց բրոնզե մեդալ: Ինչպես հաղորդում է «Արմենպրես»-ը` երկամարտում Խուրշուդյանը գրանցեց 294 կգ արդյունք: Պոկում վարժությունում մեր մարզուհին բարձրացրեց 128, իսկ հրում վարժությունում` 166 կգ: Հռիփսիմեին կարող էին շրջանցել Նիգերիայի և Հարավային Կորեայի ներկայացուցիչները, սակայն վերջիններս ձախողեցին իրենց կարևորագույն մոտեցումները:

Այս քաշային կարգում օլիմպիական չեմպիոնի կոչումը նվաճեց Չինաստանը ներկայացնող Լու Լու Չժոուն` երկամարտի 333 կգ արդյունքով, իսկ արծաթե մեդալակիր դարձավ ռուսաստանցի Տատյանա Կաշիրինան` 332 կգ-ով: