2 րոպեի ընթերցում
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Իրանը Թուրքիայում զբոսաշրջությանը հարվածող երկու սահմանափակումներ է մտցրել:
Ինչպես հաղորդում է «Արմենպրես»-ը` վկայակոչելով թուրքական «Սոնդաքիքա» լրատվական կայքը, Իրանում արգելվել է արտաքին զբոսաշրջությունը գովազդող վահանակների տեղադրումը փողոցներում եւ մարդաշատ վայրերում: Բացի այդ, դադարեցվել է արտասահման մեկնող քաղաքացիներին էժան արտարժույթի վաճառքը:
Այս մասին հայտարարել է Իրանի մշակույթի եւ իսլամական հրահանգավորման նախարարությունը` նշելով, որ այդ սահմանափակումներն արվում են ներքին զբոսաշրջությունը զարգացնելու նպատակով: Նախարարությունը կրոնական զբոսաշրջության նկատմամբ որեւէ սահմանափակում չի մտցրել:
Մինչ այդ որոշումը Իրանը շուկայական գներից 40 տոկոս էժան արտարժույթ էր վաճառում զբոսաշրջության նպատակով արտասահման մեկնող իր քաղաքացիներին` Թուրքիա մեկնողներին 400 դոլար, այլ երկրներ մեկնողներին` մինչեւ 1000 դոլարի սահմանում:
Փորձագետները զբոսաշրջիկ քաղաքացիների նկատմամբ Թեհրանի այդ սահմանափակումները պայմանավորում են նաեւ Արեւմուտքի` Իրանի դեմ պատժամիջոցներով: Սակայն Թեհրանի սահմանափակումները մեծ հարված են հասցրել թուրքական զբոսաշրջությանը, քանի որ իրանցիները հիմնականում հանգստանում են Թուրքիայում: Նշվում է, որ հիշյալ սահմանափակումների պատճառով Իրանից Թուրքիա մեկնող զբոսաշրջիկների թիվը 2012 թ-ի առաջին կեսին 39 տոկոսով նվազել է: