1 րոպեի ընթերցում
ԳՅՈՒՄՐԻ, 22 ՓԵՏՐՎԱՐԻ, ԱՐՄԵՆՊՐԵՍ: Գյումրու Գ. Գյուլբեկյանի անվան վիրաբուժական հիվանդանոց տեղափոխված ազգությամբ թուրք վարորդի վիճակը գնահատվում է բավարար: Նշենք, որ այսօր գիշեր ժամը 02:00-ի սահմաններում Գյումրի-Երեւան ճանապարհի Ազատան գյուղի մոտակայքում Տրապիզոնի բեռնափոխադրումներ իրականացնող բեռնատար մեքենան դուրս էր եկել ճանապարհի երթեւեկելի հատվածից եւ գլորվել ձորակը: Վարորդը` ազգությամբ թուրք` 1952 թվականին ծնված Թունա Զուլիսիկարը որովայնի եւ կրծքավանդակի շրջանում ստացած վնասվածքների հետեւանքով, տեղափոխվել էր Գյումրու վիրաբուժական հիվանդանոց: Ինչպես «Արմենպրես»-ին տեղեկացրեց հիվանդանոցի հերթապահ բժիշկ Արթուր Սահակյանը, հիվանդի վիճակը կայուն է:
«Վերջինիս մոտ չկան լուրջ վնասվածքներ, սակայն ունի բուժման եւ դինամիկ հսկողության կարիք: Միակ խնդիրը բժիշկների համար լեզվականն է»,-նշեց բժիշկը:
Դեպքի մանրամասները կպարզվեն Ախուրյանի քննչական բաժանմունքի կողմից տարվող քննության արդյունքում: