ԱՄՆ-ում ծխախոտի մնացորդից վերցված ԴՆԹ նմուշի շնորհիվ բացահայտվել է 44 տարվա վաղեմության սպանություն
1 րոպեի ընթերցում
![Final cigarette stubbed out, end of smoking](http://armenpress.am/resized/480/storage/images/articles/2024/08/31/cOTYhqJOyyu99MPdmHPnskfsN8rPVDeuTYnKdvyn.webp)
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ։ Միացյալ Նահանգներում ծխախոտի մնացորդի ԴՆԹ նմուշի շնորհիվ բացահայտվել է քառասունչորս տարի առաջ տեղի ունեցած սպանությունը։
«Արմենպրես»-ի փոխանցմամբ՝ այս մասին հայտնել է CNN հեռուստաալիքը՝ հղում կատարելով ոստիկանությանը։
«Ծխախոտի մնացորդից վերցված ԴՆԹ նմուշի շնորհիվ հնարավոր է եղել ձերբակալել 1980 թվականին Վաշինգտոն նահանգում կնոջ սպանության մեջ կասկածվողին», - նշել է հեռուստաալիքի կայքը։
Ըստ աղբյուրի՝ Արկանզասում ձերբակալվել է երեսունամյա Դորոթի Մարիա Սիլզելի սպանության մեջ մեղադրվող տղամարդը։ Նրա անունը Քենեթ Դուեյն Կունդերտ է և ներկայումս նա 65 տարեկան է։
Դորոթի Սիլզելը մահացած է հայտնաբերվել 1980 թվականի փետրվարին Քենթի իր տանը՝ խեղդամահության նշաններով: ԴՆԹ-ի նմուշներ են հավաքվել հանցագործության վայրից, սակայն այն ժամանակ չի եղել կասկածյալին նույնականացնելու տեխնոլոգիա։ Հետագայում քննիչները համեմատել են ԴՆԹ-ի բազմաթիվ նմուշները հանցագործության վայրում ձեռք բերվածների հետ, սակայն համապատասխանություններ չեն եղել: Միայն 2022 թվականին՝ օգտագործելով գենետիկական ծագումնաբանությունը, հնարավոր է եղել պարզել 11 կասկածյալի ինքնությունը։