Հասարակական

Գեղարքունիքի մարզում տեղի են ունենում Հայոց ցեղասպանության սրբադասված նահատակների հիշատակին նվիրված միջոցառումներ

2 րոպեի ընթերցում

Գեղարքունիքի մարզում տեղի են ունենում Հայոց ցեղասպանության  սրբադասված նահատակների հիշատակին նվիրված միջոցառումներ

ԳԱՎԱՌ, 24 ԱՊՐԻԼԻ, ԱՐՄԵՆՊՐԵՍ։ Գեղարքունիքի մարզկենտրոն Գավառում, Մարտունի, Սևան, Վարդենիս, Ճամբարակ քաղաքներում ու գյուղական բնակավայրերում տեղի են ունենում Հայոց ցեղասպանության սրբադասված նահատակների հիշատակին նվիրված միջոցառումներ։

Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, Գավառ քաղաքում Հայոց ցեղասպանության սրբադասված նահատակների հիշատակը հավերժացնող հուշաքարի առջև հարգանքի տուրքն են մատուցել մարզպետ Կարեն Սարգսյանը, մարզպետի տեղակալներ Վահան Զարոյանը, Ջանիկ Բազեյանը, Գավառ համայնքի ղեկավարի տեղակալներ Գրիգոր Դաշտոյանը, Գրիգոր Բոշյանը, Մուրադ Մովսիսյանը, մարզպետարանի և համայնքապետարանի աշխատակազմերի, կրթամշակութային հաստատությունների ներկայացուցիչներ, դպրոցականներ, Հայ Առաքելական եկեղեցու Գեղարքույնաց թեմի հոգևոր դասի անդամներ։

Ի հիշատակ Հայոց ցեղասպանության սրբադասված նահատակների՝ Գավառի Սուրբ Աստվածածին եկեղեցում տեղի է ունեցել խնկարկման և մոմավառության արարողություն, մատուցվել Սրբերի բարեխոսության կարգ՝ ձեռամբ Գեղարքունյաց թեմի Գավառի հոգևոր հովիվ Տեր Նշան քահանա Սարգսյանի։ Բարեխոսության կարգից հետո հոգևոր հովիվը հնչեցրել է ոգեկոչման խոսքեր։

Սևանի, Մարտունու, ճամբարակի և Վարդենիսի համայնքապետարանների աշխատակազմերի տեղեկացմամբ՝ Մեծ Եղեռնի 109-րդ տարելիցի առթիվ հիշատակի տարբեր արարողությունների միջոցով հարգանքի տուրք է մատուցվել նաև իրենց համայնքներում և բնակավայրերում, կրթամշակութային հաստատություններում՝ քայլերթերի, ծաղկեդրման, մոմավառության, գրական-երաժշտական ցերեկույթների տեսքով։

Խոսրով Խլղաթյան

AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2025 ARMENPRESS

Ստեղծվել է՝ MATEMAT-ում