ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի պաշտպանության և անվտանգության հարցերի մշտական հանձնաժողովը հավանություն տվեց մարտական գործողությունների հետևանքով 3-րդ կարգի հաշմանդամություն ստացած անձանց փոխհատուցում տալու մասին օրինագծին: «Արմենպրես»-ի հաղորդմամբ՝ «Լուսավոր Հայաստան» խմբակցության ներկայացրած «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» ՀՀ օրենքում փոփոխություններ եւ լրացումներ կատարելու մասին օրինագիծը քննարկվեց հանձնաժողովի նոյեմբերի 29-ի նիստում:

«Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» Հայաստանի Հանրապետության օրենքը նախատեսում է առողջությանը պատճառված վնասի դեպքում հատուցում՝ անձի առաջին եւ երկրորդ խմբի հաշմանդամություն ունենալու դեպքում: Նախագծով առաջարկվում է հատուցում նախատեսել նաեւ երրորդ խմբի հաշմանդամություն ունեցող անձանց մասով: Խմբակցության պատգամավոր Գևորգ Գորգիսյանը վստահեցրեց, որ դա հատուցման համապատասխան հիմնադրամի շարունակականությանը դա չի վնասում, ռիսկեր չի առաջացնում:

ՀՀ պաշտպանության փոխնախարար Գաբրիել Բալայանը հայտնեց կառավարության դիրքորոշումը՝ կառավարությունը գտնում է, որ պետք չէ օրենքի մեջ լրացում կատարել: «Կառավարության պարտականությունը ընդունված օրենքների իրագործելիությունն ապահովելն է: Եթե այս օրենքն ընդունվի մենք խիստ կասկածի տակ կդնենք կառավարության կողմից այդ իրագործելիության ապահովումը: 2020-ի հունվարի 1-ից ֆիզիկապես հնարավոր չի լինելու նախագծով նախատեսվածն ապահովել»,-ասաց Բալայանը:

Նա նշեց, որ տարվա ընթացում շատ փոփոխություններ են լինում, որոշ մարդիկ հաշմանդամության 2-րդ կարգից անցնում են 3-րդ կարգ, շատերի հաշմանդամության կարգը վերացվում է: «Խիստ մակերեսային է, կան բազմաթիվ քրեական գործեր, որ անհիմն կերպով են այդ կարգերը տրվել»,-ասաց փոխնախարարն ու առաջարկեց դրա փոխարեն 3-րդ կարգի զինհաշմանդամների թոշակի բարձրացման մասին հարց քննարկել:

Այնուամենայնիվ նախագիծը հանձնաժողովում ստացավ դրական եզրակացություն: