Աշոտ Ղուլյանն անկախության դաս է վարել Արցախի պետական համալսարանի ուսանողների համար
15:22, 3 Սեպտեմբեր, 2019ՍՏԵՓԱՆԱԿԵՐՏ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Արցախի Հանրապետության Ազգային ժողովի նախագահ Աշոտ Ղուլյանը սեպտեմբերի 3-ին «անկախության դաս» է վարել Արցախի պետական համալսարանի առաջին կուրսեցիների համար:
Ինչպես «Արմենպրես»-ին հայտնեցին ՀՀ ԱԺ լրատվության և հանրության հետ կապերի բաժնից, ԱԺ նախագահը շնորհավորել է ուսանողներին և երկրի ուսումնական հաստատությունների բոլոր սաներին գիտելիքի և դպրության օրվա կապակցությանը և համայն հայությանը՝ Արցախի Հանրապետության տոնի առթիվ:
Ողջունելով «անկախության դասը» խորհրդարանի շենքում անցկացնելու հանգամանքը՝ Աշոտ Ղուլյանն խորհրդանշական է համարել առաջին դասը սկսել այն դահլիճում, որտեղ կայացվում են պետության համար կենսական կարևորության որոշումները: Այնուհետև նա հակիրճ պատմական ակնարկով անդրադարձել է Արցախի Հանրապետության անկախության հռչակման գործընթացին, արցախյան ազատագրական պայքարին և հետագա տարիների ընթացքում պետականության ամրապնդման ուղղությամբ կատարված աշխատանքներին:
«Տարիներով զրկված լինելով անկախ պետականությունից՝ մենք հնարավորություն չենք ունեցել մեր ազգային կապիտալը ներդնելու սեփական հայենիքի զարգացմանը, արդյունքում, ցավոք, կորցրել ենք այդ կապիտալի մի մասը: Այսօր արդեն սեփական ուժերի լարումով ու ապագայի նկատմամբ մեծ լավատեսությամբ պետք է անենք հնարավորն ու անհնարը՝ լրացնելու մեր կորցրածը և ամեն օր ստեղծելու նոր արդյունք»,- նշել է խորհրդարանի ղեկավարը:
Խորհրդարանի նիստերի մեծ դահլիճում կայացած հանդիպմանը մասնակցել և ելույթ են ունեցել նաև Պաշտպանության նախարար, պաշտպանության բանակի հրամանատար Կարեն Աբրահամյանը, Կրթության, գիտության և սպորտի նախարար Նարինե Աղաբալյանը և մայր բուհի ռեկտոր Արմեն Սարգսյանը:
© 2009 ARMENPRESS.am