ԱԺ անցակետերում տեղադրված ռենտգենային զննող սարքավորումները կփոխարինվեն նորերով
13:28, 16 Մայիս, 2019ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: ՀՀ Ազգային ժողովի անցակետերում անվտանգության ապահովման նպատակով տեղադրված ռենտգենային զննող սարքավորումները կփոխարինվեն նորերով: «Արմենպրես»-ի հաղորդմամբ՝ կառավարության նիստից հետո լրագրողների հետ ճեպազրույցում այս մասին ասաց ԱԺ աշխատակազմի ղեկավար-գլխավոր քարտուղար Տիգրան Գալստյանը:
Նրա խոսքով՝ սարքերը հին են և անընդհատ խափանվում են: «Արտադրությունից դուրս եկած են անգամ այդ ռենտգեն սարքերի պահեստամասերը»,-ասաց նա:
Ռենտգենային զննող չորս սարքավորումներ ձեռք բերելու համար 85 մլն դրամ կպահանջվի:
Գալստյանը հերքեց նաև այն լուրերը, որ այդ սարքերից մեկը տեղակայված է լինելու ՀՀ ԱԺ նախագահ Արարատ Միրզոյանի մուտքի մոտ: «ԱԺ նախագահի մուտքի մոտ տեղադրվելու է միայն կամարը, ռենտգեն սարքը այլ տարածքի համար է նախատեսված: Սուտ է նաև այն տեղեկատվությունը,որ իմ տեղակալը զենք է անցկացրել շենք: Դրանք ընդամենը քննարկումներ են»,-հավելեց նա:
Անդրադառնալով ԱԺ նախագահի գործողումների քանակին՝ Գալստյանն ասաց, որ հրավերները բավական շատ են: «Այդ հրավերներից ընտրվում է այն մասը, որն անհրաժեշտ է խորհրդարանական դիվանագիտության, պետության համար»,-ասաց նա՝ հավելելով, որ գործողումների քանակն այս տարի ավելացել է նախորդ տարվա համեմատ:
© 2009 ARMENPRESS.am