Երևանում մեկնարկած միջազգային համաժողովը Հայաստանին հնարավորություն կտա առաջընթաց արձանագրել տարբեր ոլորտներում
16:50, 10 Ապրիլ, 2019ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Հայաստանում Ֆրանսիայի դեսպանությունը Թուլուզի Ինֆորմատիկայի հետազոտական ինստիտուտի, Հայաստանի գիտությունների ազգային ակադեմիայի հետ համագործակցությամբ և Հայաստանում ֆրանսիական համալսարանի և Թումոյի աջակցությամբ իրականացնում է «Տվյալների գիտություն, հասարակությունների գիտություն» խորագրով միջազգային համաժողով:
«Արմենպրես»-ի հաղորդմամբ՝ այն եռօրյա է ու տևելու է ապրիլի 10-ից 12-ը:
Կոնֆերանսի ընթացքում քննարկվեցին արհեստական բանականության, մեգատվյալների դերը կայուն զարգացման մեջ և կիբերավտանգության թեմաները:
Հայաստանի Ֆրանսիական համալսարանի ռեկտոր Ժան-Մարկ Լավեստը նշեց, որ անցում է կատարվում և՛ տեխնոլոգիական, և՛ հասարակական ժամանակաշրջան:
«Կարծում եմ, որ այդ անցման մեջ մեծ դեր պետք է ունենան մասնավոր անձինք, ինչպես նաև պետական ու հանրային գործիչները»,- ասաց Լավեստը:
Նրա կարծիքով՝ պետք է բարձրացնել այն հարցերը, որոնք վերաբերում են գիտությանը և պետք է սպասարկեն մեր հասարակություններին:
ՀՀ-ում Ֆրանսիայի դեսպան Ժոնաթան Լաքոտը շեշտեց, որ 6 ամիս առաջ ստորագրվել է համաձայնության արձանագրություն՝ Հայաստանի գիտությունների ազգային ակադեմիայի և Թուլուզի 3 համալսարանների միջև:
«Այդ արձանագործությունը հնարավորություն է տալու Երևանում ստեղծել Բարձր արտադրողականությամբ հաշվարկների ազգային կենտրոն, ինչը հնարավորություն կտա ունենալ մի էկոհամակարգ ամբողջ հարավային Կովկասում: Այն կհամատեղի գիտական, սոցիալ-տնտեսական հետազոտությունները պետական գործիչների բարձր արտադրողականությամբ հաշվարկների և թվային սիմուլյացիայի շուրջ»,- ասաց Լաքոտը:
Դեսպանի խոսքով՝ այս գիտաժողովը հնարավորություն կտա Հայաստանին առաջընթացներ արձանագրել բնական ռիսկերի կառավարման, գյուղատնտեսության և մի շարք այլ ոլորտներում:
Եռօրյա թեմատիկ 4 կլոր սեղանների շուրջ քննարկումները կանցկացվեն հանրային, մասնավոր տնտեսական և գիտական ոլորտների միջազգային բանախոսների մասնակցությամբ:
© 2009 ARMENPRESS.am