ԵՄ-ի հետ փոխգործակցությունը խորացնելու քաղաքական կամքն ավելացել է. Նիկոլ Փաշինյան
16:33, 5 Մարտ, 2019ԲՐՅՈՒՍԵԼ, 5 ՄԱՐՏԻ, ԱՐՄԵՆՊՐԵՍ: Հայաստանի Հանրապետության վարչապետ Նիկոլ Փաշինյանը Բրյուսելում Եվրոպական խորհրդի նախագահ Դոնալդ Տուսկի հետ հանդիպմանը քննարկել է բազմաթիվ հարցեր՝
սկսած Հայաստանում ժողովրդավարական վերափոխումներից մինչև ընթացիկ տարածաշրջանային եւ միջազգային զարգացումներ:
«Ուրախությամբ ենք ընդգծում Հայաստանի ու Եվրոպական Միության միջև քաղաքական երկխոսության ու համագործակցության բարձր մակարդակը: Ես շեշտեցի, որ թավշյա հեղափոխությունից հետո Հայաստանի վճռականությունը և Եվրամիության հետ փոխգործակցությունը խորացնելու քաղաքական կամքն ավելացել է»,- «Արմենպրես»-ի փոխանցմամբ, ասաց Նիկոլ Փաշինյանը:
Նրա խոսքով՝ տարին արդեն սկսվել է բարձր մակարդակի քաղաքական այցելություններով, ու ինքը վստահ է, որ առաջիկա ժամանակահատվածում այն կշարունակվի շատ կարևոր զարգացումներով ու իրադարձություններով, որոնք կնպաստեն քաղաքական երկխոսությանն ու գործընկերությանը:
Հայաստանի Հանրապետության վարչապետ Նիկոլ Փաշինյանը մարտի 3-5-ը աշխատանքային այցով Բելգիայի Թագավորությունում է: