ՀՀ վարչապետի տիկինը ԵՊՀ ժուռնալիստիկայի ֆակուլտետի ուսանողների հետ քննարկեց ապագա լրագրողներին հուզող հարցերը
18:10, 4 Հունիս, 2018ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանի տիկին Աննա Հակոբյանը հունիսի 4-ին հանդիպեց Երևանի պետական համալսարանի ժուռնալիստիկայի ֆակուլտետի ուսանողների հետ` պատասխանելով նրանց հուզող հարցերին, որոնք վերաբերում էին ամենատարբեր ոլորտներին:
Ինչպես տեղեկացնում է «Արմենպրես»-ը, ուսանողներից մեկի հարցին` թե արդյո՞ք կարող է պրոֆեսիոնալ լրագրողներին խոչընդոտ հանդիսանալ անհատ քաղաքացիների կողմից սոցիալական ցանցերում տեղեկություն տրամադրումը, վարչապետի տիկինը պատասխանեց, որ սոցիալական ցանցերում անհատ քաղաքացիների «լրագրողական գործունեությունը» ոչ միայն չի խոչընդոտում պրոֆեսիոնալ լրագրողներին, այլ նաև օգնում է:
«Անհատ քաղաքացիներն, ովքեր, ըստ էության, նաև լրագրողական գործունեություն են ծավալում իրենց սոցիալական էջերում` նկարահանում են տեսանյութեր, տեղեկություն տրամադրում: Այդպիսով նրան ոչ թե խոչընդոտում են պրոֆեսիոնալ լրագրողներին, այլ մեծապես օգնում են»,- ասաց Աննա Հակոբյանը:
Աննա Հակոբյանը, ով նաև «Հայկական ժամանակ» օրաթերթի գլխավոր խմբագիրն է, գտնում է, որ նույնիսկ տեխնիկապես հագեցած լրատվամիջոցները միշտ չէ, որ կարող են ամեն տեղ իրենց ներկայությունը ապահովել:
«Այդ գործունեությունը անհատ քաղաքացիների անհատական նախաձեռնությամբ պայմանավորված մեծապես նպաստում է լրագրողական աշխատանքին, առնվազն այն իմաստով, որ լրագրողները տեսնում են, որտեղ ինչ է կատարվել և կարող են գնալ հետքերով: Այս մասին խոսելով՝ կարող ենք բերել օրինակներ վերջին շրջանի իրադարձությունների հետ կապված: Բազմաթիվ լրատվամիջոցների լրագրողներ ուղղակի գրառում էին կատարում, հարցնելով քաղաքացիներին, որ փոխանցեն, թե որ հատվածներում ինչ ճանապարհ կա փակ: Լրատվամիջոցներում բազմաթիվ նյութեր կհանդիպեք, որոնք սիրողական նկարահանումներ են և որոնք շատ արժեքավոր տեղեկություն են կրում: Ուստի անհատ քաղաքացիների աշխատանքը ոչ միայն չի խոչընդոտում լրագրողներին, այլ նաև օգնում»,- ասաց Հակոբյանը:
Աննա Հակոբյանին ուսանողները նաև հայտնում էին տարբեր ոլորտներում առկա խնդիրների մասին:
Վարչապետի տիկինը նշեց, որ ուսանողները կարող են նաև օգտագործել մամուլի ուժը, և այդ խնդիրները ավելի արագ լուծում կստանան:
«Ցանկանում եմ հիշեցնել մամուլի ուժի մասին և բոլորին ուղղորդել դեպի մամուլ: Ցանկացած լրատվամիջոցի հայտնեք ձեր մտահոգությունները, ձեր ծրագիրը, և դա շատ ավելի արագ կհասնի պաշտոնյաներին»,- եզրափակեց Հակոբյանը:
Լուսանկարը՝ Աննա Հակոբյանի ֆեյսբուքյան էջից
© 2009 ARMENPRESS.am