ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Երևանի «Ուրարտու» բասկետբոլային ակումբը չի թերագնահատում մրցակիցներին, սակայն Հայաստանի առաջնության 3-րդ տեղի համար մրցախաղում պայքարելու է միայն հաղթանակի համար:

«Արմենպրես»-ի հետ զրույցում նման կարծիք հայտնեց «Ուրարտու» ակումբի նախագահ Կարեն Գիլոյանը: «Մրցաշրջանի մեկնարկից սկսած որևէ թիմի չենք թերագնահատել: Բոլորին էլ համարել ենք լուրջ մրցակիցներ: Մենք պարտավոր ենք 3-րդ տեղի համար խաղում հաղթել և գոնե արժանանալ մրցանակային տեղի»,-շեշտեց ակումբի նախագահը:

Խոսելով կիսաեզրափակիչում «Արցախ»-ից կրած պարտություններին՝ Գիլոյանը շեշտեց, որ մրցակիցը շատ էր ուժեղացրել կազմը և կարողացավ անձնուրաց խաղալ` արժանի լինելով հաղթանակի:

Հայաստանի բասկետբոլի կանոնավոր առաջնության 3-րդ տեղի համար խաղը տեղի կունենա վաղը ՝ ժամը 19:00-ին, Օլիմպավանում, որում «Ուրարտու»-ն ուժերը կչափի ՖԻՄԱ-ի հետ: