ԵՐԵՎԱՆ, 15 ՄԱՐՏԻ, ԱՐՄԵՆՊՐԵՍ: Հայաստանի Հանրապետության արտաքին գործերի փոխնախարար Շավարշ Քոչարյանը ողջունելի է համարում ՌԴ Դաշնային ժողովի Դաշնության խորհրդի միջազգային գործերով կոմիտեի նախագահ Կոնստանտին Կոսաչովի հայտարարությունն այն մասին, որ Ռուսաստանը չի շարունակի նույն մասշտաբներով սպառազինություն մատակարարել Ադրբեջանին, որը կար մինչև 2016թ. ապրիլյան պատերազմը:  «Արմենպրես»-ի փոխանցմամբ՝ այս մասին կառավարության նիստից հետո Քոչարյանն ասաց լրագրողների հետ ճեպազրույցում:

«Միշտ էլ սպառազինության համար մեկ մատակարարողն Ադրբեջանին եղել է Ռուսաստանը: Մենք դա լավ գիտենք: Այս հայտարարությունից տպավորությունն այն է, որ ինչ-որ հետևություններ արվում են Ռուսաստանի կողմից: Արձանագրում եմ, որ ողջունելի է այդպիսի հայտարարությունը», - ասաց Շավարշ Քոչարյանը:

Կոնստանտին Կոսաչովը մարտի 14-ին ՀՀ Ազգային ժողովում լրագրողների հետ հանդիպմանը ասել էր, որ Ռուսաստանը չի շարունակի նույն մասշտաբներով սպառազինություն մատակարարել Ադրբեջանին, որը կար մինչև 2016թ. ապրիլյան պատերազմը: Նա նշել էր, որ Ռուսաստանը իրականացնում է այն պայմանագրերը, որոնք Ադրբեջանի հետ կնքվել են մինչև 2016թ. ապրիլ:

«Մենք պարտավոր ենք անել դա այդ պայմանագրերին համապատասխան: Սակայն իմ ունեցած տեղեկատվությամբ դա չի լինի այն մասշտաբներով, որը կար 2016թ. ապրիլի դրությամբ: Անկասկած, մենք արձագանքում ենք իրավիճակին, որը տեղի ունեցավ 2016թ. ապրիլին»,- ասել էր Կոնստանտին Կոսաչովը: