ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: ՀՀ վարչապետի հանձնարարությամբ մարտի 2-ին Պետական եկամուտների կոմիտեում հանդիպում է տեղի ունեցել ՊԵԿ ներկայացուցիչների և կառուցապատման ու շինարարության ոլորտում գործունեություն իրականացնող հարկ վճարողների հետ: Այս մասին «Արմենպրես»-ին տեղեկացրին ՀՀ ԿԱ ՊԵԿ տեղեկատվության և հասարակայնության հետ կապերի բաժնից:

Հանդիպումը հաջորդել է ոլորտի պատասխանատուների և համապատասխան պետական մարմինների ներկայացուցիչների հետ կառավարությունում կայացած խորհրդակցությանը: Հանդիպման ընթացքում քննարկվել են գործող հարկային օրենսդրության շրջանակում ոլորտում առկա խնդիրներն ու ռիսկերը, դիտարկվել դրանց կարգավորման ուղիների հետ կապված հարցեր: