ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Հայաստանի և Վրաստանի կառավարությունների միջև Երևանում տեղի ունեցած բանակցություններում քննարկվել են տարբեր ուղղություններով համագործակցությունը զարգացնելուն ուղղված հարցեր: Այդ մասին ասաց Վրաստանի վարչապետ Գիորգի Կվիրիկաշվիլին՝ ՀՀ վարչապետ Կարեն Կարապետյանի հետ բանակցություններն ամփոփելիս:  «Քննարկել ենք երկկողմ հարաբերությունների բազմաթիվ հարցեր՝ դրանք վերաբերում են տնտեսական երկկողմ հարաբերություններին. ողջունում եմ այն փաստը, որ ունենք կայուն դինամիկա առևտրատնտեսական հարաբերություններում: Իմ գործընկերոջը շնորհավորում եմ Հայաստանում տնտեսական աճի շատ բարձր ցուցանիշի կապակցությամբ, այս հաջողությունը մեզ ևս ուրախացնում է՝ որպես Հայաստանի բարեկամ ու հարևան պետություն»,- «Արմենպրես»-ի փոխանցմամբ, ասաց Կվիրիկաշվիլին:

Նրա խոսքով, քննարկվել են այնպիսի կարևոր ուղղություններ, ինչպիսիք են՝ էներգետիկան, տրանսպորտը, զբոսաշրջությունը, մշակութային հարաբերությունները, արվեստը, կրթությունը և իհարկե ինչպես նշվեց՝ աշակերտների ու ուսանողների փոխանակման ծրագրերին աջակցությունը: «Մենք պատրաստ ենք Վրաստանի կողմից առավելագույնս օժանդակել երիտասարդների միջև նոր հարաբերություններին և այս ուղղությամբ իսկապես ունենք շատ անելիքներ: Կարևոր է նաև նորագույն նվաճումների, փորձի փոխանակումը, և ուրախ եմ, որ այս շրջանակում կայցելեմ Հայաստանի կրթական զարգացման «Թումո» կենտրոն, հուսով եմ, որ համագործակցությունն այս բնագավառում ավելի կխորանա»,- ասաց Վրաստանի վարչապետը:

2017-ի արդյունքներով ՀՀ-ում արձանագրվել է ՀՆԱ-ի 7,5 տոկոսանոց աճ: