Չեչնիայում քրեական պատասխանատվություն կսահմանվի Մեծ հայրենական պատերազմի վերաբերյալ փաստերի խեղաթյուրման համար
21:59, 13 Փետրվար, 2018ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Չեչնիայի խորհրդարանում մշակել և օրակարգ են մտցրել Մեծ հայրենական պատերազմի վերաբերյալ փաստերի խեղաթյուրման համար քրեական պատասխանատվություն սահմանելու վերաբերյալ օրինագիծ:
Ինչպես հաղորդում է «Արմենպրես»-ը՝ վկայակոչելով ՏԱՍՍ-ը, այս մասին հայտնել է տարածաշրջանի օրենսդիր մարմնի լրատվական ծառայությունը:
Մեծ հայրենական պատերազմի վերաբերյալ փաստերի խեղաթյուրման համար քրեական պատասխանատվություն սահմանող օրինագիծ մշակելու առաջարկով փետրվարի սկզբին հանդես էր եկել Չեչնիայի նախագահ Ռամզան Կադիրովը: Չեչնիայի խորհրդարանում հարցը կքննարկվի առաջիկա հինգշաբթի օրը՝ փետրվարի 15-ին: