Քաղաքագետը բանակցային գործընթացում ակտիվացում չի կանխատեսում
15:15, 19 Հունվար, 2018ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Քաղաքագետ Ալեքսանդր Իսկանդարյանը
Ղարաբաղյան հակամարտության կարգավորման գործընթացում ակտիվացում մոտ ժամանակներս չի ակնկալում: «Արմենպրես»-ի հաղորդմամբ, լրագրողների հետ հանդիպմանը Իսկանդարյանն ասաց, որ Մայդորֆյան բանակցությունների ձախողումից հետո համանախագահները ավելի շատ զբաղվում են ոչ թե հակամարտության կարգավորմամբ , մենեջմենթով: «Նրանց գործողությունները ավելի շատ սահմանին բռնություններն ու էսկալացիաները բացառելու նպատակ ունեն: Վերջին տարիներին դա նրանց հաջողվում է»,-ասաց քաղաքագետը:
Նրա խոսքով` արցախյան հակամարտությունն այն փուլում չէ, որ հնարավոր լինի որեւէ փոփոխություն ակնկալել: «Ավելի շուտ ակտիվացում կլինի ոչ թե կարգավորման, այլ սահմանին լարվածության մեծացման հետ կապված»,-հավելեց բանախոսը:
ԵԱՀԿ Մինսկի խմբի համանախագահների նախաձեռնությամբ հունվարի 18-ին Կրակովում տեղի է ունեցել Հայաստանի և Ադրբեջանի արտաքին քաղաքական գերատեսչությունների ղեկավարներ Էդվարդ Նալբանդյանի և Էլմար Մամադյարովի հանդիպումը։ Հայաստանի ու Ադրբեջանի արտգործնախարարները և համանախագահները քննարկել են հակամարտության գոտում լարվածության նվազեցման ուղղությամբ հավելյալ քայլերի իրականացումը և բանակցային գործընթացի ակտիվացման հնարավորությունները։
Հանդիպման արդյունքում որոշվել է, որ փետրվարի առաջին կեսին եռանախագահները կայցելեն տարածաշրջան։