Հոկտեմբերի 31-ին Նյու Յորքում չարագործը բեռնատար-պիկապով մեծ արագությամբ մի քանի թաղամաս Է անցել հեծանվորդների համար առանձնացված գոտիով, որը ավտոճանապարհից բաժանված Է արգելապատնեշով, եւ վրաերթի ենթարկել բոլոր նրանց, ովքեր հանդիպել են իր ճանապարհին: Այնուհետեւ հանցագործը բախվել Է դպրոցական ավտոբուսին, ինչից հետո մեքենան կանգ Է առել: Երբ տղամարդը զենքը ձեռքին դուրս Է եկել վարորդական խցիկից, ոստիկանությունը կրակ Է բացել նրա վրա՝ վիրավորելով որովայնի շրջանում:

Ահաբեկչության հետեւանքով զոհվել Է ութ մարդ, առնվազն 12 հոգի վերքեր են ստացել: Իշխանությունները նշում են, որ հարձակվողը գործել Է կանխամտածված, եւ տեղի ունեցածը որակել են ահաբեկչական գործողություն:

Ահաբեկչությունը կատարել Է Ուզբեկստանից սերված 29-ամյա Սայֆուլլո Խաբիբուլայի Սաիպովը, որը ԱՄՆ Է ժամանել 2010 թվականին եւ ապրում Էր Ֆլորիդայի նահանգի Թամպա քաղաքում:

Իր ավտոմեքենայում ահաբեկիչը թողել Է գրություն, որում ասված Է, որ ինքը հարձակումը կատարում Է ԻՊ խմբավորման անունից: ԱՄՆ-ի Հետաքննությունների դաշնային բյուրոյի տվյալներով՝ Սաիպովի բջջային հեռախոսում գտել են շուրջ 90 տեսագրություններ եւ մոտավորապես 3,8 հազար լուսանկարներ, որոնցից շատերը կապված են եղել ԻՊ-ի քարոզչության հետ: Դրանցում, մասնավորապես, տեղ են գտել զինյալների կողմից կատարված մահապատիժները, ինչպես նաեւ ԻՊ-ն ու նրա պարագլխին խորհրդանշող պատկերներ, հաղորդել Է ՌԻԱ Նովոստին: