«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:

Այսօր` հոկտեմբերի 18-ին, ՀՀ տնտեսական զարգացման և ներդրումների նարարար Սուրեն Կարայանը հանդես կգա մամուլի ասուլիսով: Նա կներկայացնի վերջին մեկ տարվա աշխատանքների արդյունքները:

Անցկացվում է «Հայապահպանության գործում նշանակալի ավանդի համար» ամենամյա մրցանակաբաշխություն: Այսօր հրավիրված ասուլիսում ՀՀ սփյուռքի նախարարության համահայկական ծրագրերի վարչության պետ Գագիկ Գյանջումյանը և Ռուսաստանի հայերի միության, Համաշխարհային հայկական կոնգրեսի փոխնախագահ Վլադիմիր Աղայանը կներկայացնեն մանրամասներ մրցանակաբաշխության մասին:

ՀՀ փաստաբանների պալատը, hաշվի առնելով «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» ՀՀ օրենքի նախագծի վերաբերյալ բուռն արձագանքը, շրջանառվող տարակարծությունները՝ նախաձեռնել է թեմայի շուրջ կլոր սեղան-քննարկում:

ՄԱԿ-ի հայաստանյան գրասենյակում հոկտեմբերի 18-19-ը տեղի կունենան 8-րդ Ազգային սոցիալական գործընկերության համաժողովը՝ «Սոցիալական և համերաշխ տնտեսություն ու սոցիալական գործընկերության խթանում. Շվեյցարիայի լավագույն փորձը» խորագրով: Շվեյցարիայից ժամանած կազմակերպությունները կներկայացնեն նշված խնդիրների կարգավորման իրենց երկրի փորձը:

Սատանդարտացման ոլորտի մասանգետները նշում են մասնագիտական տոնը: Ստանդարտների համաշխարհային օրը նպատակաուղղված է արժանին մատուցել հազարավոր փորձագետների աշխատանքին, որոնք մշակում են ազգային, տարածաշրջանային և միջազգային ստանդարտները։ 2017 թվականի կարգախոսն է՝ «Ստանդարտները քաղաքները դարձնում են խելացի»։ Օրվա առթիվ, Երևանում կանցկացվի միջոցառում, որին կմասնակցեն ՀՀ տնտեսական զարգացման և ներդրումների նախարար Սուրեն Կարայանը, ՄԱԿ-ի Հայաստանի գրասենյակի ղեկավար, ՄԱԿ-ի դեսպան Բրեդլի Բուզետտոն և այլք: Միջոցառման ընթացքում պարգևներ ու շնորհակալագրեր կհանձնվեն որոշ ընկերությունների։

Լրագրողների հետ կհանդիպի պատմաբան, ռազմական փորձագետ Արթուր Եղիազարյանը: Նա կխոսի զինապարտության և զինվորական ծառայության մասին օրենսդրական նոր կարգավորումների վերաբերյալ:

Հոկտեմբերի 21-ին Երևանում հայ հանդիսատեսին կներկայացվի «Փրկության քարտեզ» ֆիլմը: Լրագրողների հետ հանդիպմանը «Փրկության քարտեզ» ֆիլմի պրոդյուսեր Մանվել Սարիբեկյանը, «Man Pictures» ստուդիայի հիմնադիր-տնօրեն, ֆիլմի ռեժիսոր Արամ Շահբազյանը կներկայացնեն մանրամասներ ֆիլմի մասին: Այն Հայոց ցեղասպանության ականատեսների՝ եվրոպացի 5 միսոներ կանանց ճակատագրական պատմությունների մասին է, որոնք հայտնվելով «արյան և արցունքների երկրում» միայնակ կարողացան փրկել հազարավոր հայ երեխաների ու կանանց:  Ֆիլմը նկարահանվել է 9 երկրում՝ 45 դերակատարների մասնակցությամբ: Ցուցադրումները կայացել են 14 երկրում 31 քաղաքներում:

Առնո Բաբաջանյանի անվան ֆիլհարմոնիայի մամուլի սրահում էլ լրագրողների հետ կհանդիպի ջութակահար Նիկոլայ Մադոյանը՝ Գինեսի համաշխարհային ռեկորդ սահմանելու կապակցությամբ: Ն.Մադոյանը հայ երաժիշտներից առաջինն է, որ գրանցվել է Գինեսի գրքում:

Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: