ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ: ՅՈՒՆԵՍԿՕ-ում Իսրայելի դեսպան Կարմել Շամա-Կոենը խորհուրդ է տվել իր պետությանը հետևել ԱՄՆ-ի օրինակին և լքել միջազգային կազմակերպության շարքերը: «Մինչ այսօր ես մնում էի այն կարծիքին, որ մենք չպետք է դուրս գանք ՅՈՒՆԵՍԿՕ-ից՝ չնայած նրա բոլոր խելագար որոշումներին: Այժմ, այն բանից հետո, երբ ԱՄՆ-ն դուրս է գալիս հիմնականում ՅՈՒՆԵՍԿՕ-ում Իսրայելին հետապնդելու համար, իմ կարծիքով, անհապաղ պետք է դուրս գանք նրանց հետ»,- ինչպես փոխանցում է «Արմենպրես»-ը, այդ մասին դեսպանը գրել է ֆեյսբուքյան իր էջում:  

Միաժամանակ նա նշել է, որ սա իր անձնական կարծիքն է և վերջնական խոսքը պատկանում է Իսրայելի վարչապետ Բինյամին Նեթանյահուին, ով Շամա-Կոենի խոսքով, ունի ավելի լայն և մանրամասն նկարագիր:

Իսրայելը ՅՈՒՆԵՍԿՕ-ի հետ լարված հարաբերություններ ունի Երուսաղեմի պատմական կենտրոնի կառավարման իրավունքը մշտապես վիճարկելու պատճառով: