ԵՐԵՎԱՆ, 29 ՀՈԿՏԵՄԲԵՐԻ, ԱՐՄԵՆՊՐԵՍ: 2016 թվականի օգոստոսին ՀՀ բնակավայրերի օդային ավազանի որակի շուրջօրյա ակտիվ նմուշառմամբ մշտադիտարկման միջոցառումներ են իրականացվել 16 ստացիոնար դիտակայաններում՝ մթնոլորտն աղտոտող նյութերի պարունակություններն որոշելու համար: Ինչպես տեղեկացնում է «Արմենպրես»-ը՝ վկայակոչելով ՀՀ Ազգային վիճակագրական ծառայության հրապարակած տվյալները,  շուրջօրյա ակտիվ նմուշառման միջոցով վերցվել է օդի 1 525 փորձանմուշ, պասիվ նմուշառման 214 դիտակետից՝ օդի 1 հազար 757 փորձանմուշ: Երևանում ավտոմատ դիտակայանների միջոցով կատարվել է օդի 25 հազար 721 դիտարկում:

Ըստ պաշտոնական վիճակագրության՝ Երևանում դիտակայանների և դիտակետերի քանակը 53 միավոր է: Վերահսկվող նյութերն են` ընդհանուր փոշին, ծծմբի երկօքսիդը, ազոտի օքսիդները, ածխածնի մոնօքսիդը և գետնամերձ օզոնը: Փորձանմուշների քանակը կազմել է 26 հազար 976 միավոր: Վերահսկվող նյութերի կոնցենտրացիաների գերազանցումը ՍԹԿ-ից Երևանում օգոստոսին եղել է ՀՀ նորմաների սահմաներում: