ՆԱՏՕ-ի Վարշավայի գագաթնաժողովը բեկումնային է լինելու. Ստոլտենբերգ

10:16, 23 Մայիս, 2016

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: ՆԱՏՕ-ի՝ հուլիսի 8-9-ը Լեհաստանի մայրաքաղաքում կայանալիք գագաթնաժողովում բեկումնային որոշումներ են ընդունվելու: Այդ մասին, ինչպես տեղեկացնում է «Արմենպրես»-ը, հայտարարել է ՆԱՏՕ-ի գլխավոր քարտուղար Ենս Ստոլտենբերգը Լեհական ռադիոյում մայիսի 22-ին հրապարակված հարցազրույցում:

«ՆԱՏՕ-ի հուլիսյան գագաթնաժողովը բեկումնային է լինելու,- ասել է նա:- ՆԱՏՕ-ն հանգուցային որոշումներ կընդունի այն մասին, թե ինչպես է հարմարվելու անվտանգության ոլորտի նոր իրադրությանը»:

«Մենք պետք է ամրապնդենք ՆԱՏՕ-ի ներկայությունը Եվրոպայի արեւելյան մասում, դա կլինի բազմազգ ներկայություն: Այդպիսով, մենք հստակ ազդանշան կտանք, որ մի երկրի վրա հարձակումը կդիտվի գրոհ ամբողջ ՆԱՏՕ-ի դեմ»,- նշել է գլխավոր քարտուղարը:

«Դաշնակիցներից մի քանիսը՝ ԱՄՆ-ը, Մեծ Բրիտանիան եւ Գերմանիան, արդեն հայտարարել են, որ լինելու են նրանց առաջին շարքերում, ովքեր կամրապնդեն այդ ուժերը»,- նշել է Ստոլտենբերգը՝ չհայտնելով մանրամասներ, քանի որ, նրա խոսքով, զինվորականների ու փորձագետների հետ համաձայնեցումների գործընթացը դեռեւս ավարտված չէ, հաղորդել է ՏԱՍՍ-ը:


© 2009 ARMENPRESS.am