ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Սիրիական օդային ուժերը ռմբակոծում են թուրք-սիրիական սահմանի երկայքով Նաբաա Բար և Մաաբար գյուղերի շրջակայքը և Քեսաբի մերձակայքը: Ինչպես հաղորդում է «Արմենպրես»-ը, վկայակոչելով Սիրիական ՍԱՆԱ գործակալությունը, բանակին հաջողվել ազատագրել Լաթաքիայի Խարբա Սուլաս գյուղից առևանգվածներին: Աղբյուրը նաև տեղեկացրել է, որ բանակը հարձակում է իրականցում Լաթաքիայի Բեյթ Իբլակ, Կանտարա, Ջաբալ Քուզ գյուղերում զինյալների հավաքատեղիների ուղղությամբ:

«Ալ Ջազիրա»-ի տեղեկացմամբ` սիրիական բանակը շարունակում է ռմբակոծել Լաթաքիայի շրջանում զինյալների հսկողության տակ գտնվող տարածքները: Մասնավորապես, թեժ մարտեր են ընթանում Սամրա գյուղի շրջակայքում: Աղբյուրի տեղեկացմամբ` սիրիական ուժերն օգտագործում են ռազմական օդանավեր և ուղղաթիռներ, ինչպես նաև՝ ծանր հրետանի:

Լիբանանյան «Ալ Մայադին» կայքի տեղեկացմամբ` մարտի 27-ին ականապատ մեքենա է պայթել Հոմսի հայկական թաղամասում, որի հետևանքով կան զոհեր և վիրավորներ: Թաղամասում հայեր չեն բնակվում, այժմ միայն անվանումն է մնացել հայկական: Բացի այդ, հրասանդներ են ընկել Դամասկոսի Ջարամանա թաղամասում, որի հետևանքով 6 մարդ է վիրավորվել:

Լաթաքիայի շրջանի Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանի ութ կետերից: Հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքի մեջ գրեթե բնակիչներ չեն մնացել, նրանք տեղափոխվել են առավել ապահով վայրեր: