ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիա հումանիտար օգնություն տեղափոխող ինքնաթիռի վայրէջքը Թուրքիայում պլանային էր և արվել է ըստ ձեռք բերված պայմանավորվածության։ Այս մասին «Արմենպրես»-ին տեղեկացրեց ՀՀ արտաքին գործերի նախարարության մամլո խոսնակ Տիգրան Բալայանը:

Ինքնաթիռը «Օգնիր եղբորդ» հասարակական շարժման մարդասիրական օգնությունը` 15 տոննա սնունդ, տեղափոխում է Հալեպ: Թռիչքն իրականացնում է օդային բեռնափոխադրումներ իրականացնող հայաստանյան «Էյր Արմենիա» ընկերությունը: 

Թուրքական NTV հետուստաալիքը հայտնել էր, թե Հայաստանից Սիրիա մեկնող ինքնաթիռը հարկադիր վայրէջք է կատարել Էրզրումի օդանավակայանում: Ինքնաթիռում խուզարկություն է սկսվել: Թուրքիայի արտաքին գործերի նախարարությունը հայտնել է, որ հայկական ինքնաթիռը, որն ուղևորվում էր Հալեպ, Էրզրումում իջեցվել է ստուգման նպատակով: 

13:30- Թուրքական մեկ այլ` Haberler.com կայքը հայտնում է, որ Էրզրումի օդանավակայանում ստուգվող ինքնաթիռը շրջափակել են հրշեջ մեքենաները: Դեպքի վայրից միջադեպը լուսաբանել ցանկացող լրագրողների մուտքն օդանավակայան արգելվել է: