ԼՂՀ ԱԺ-ն աշխատանքային խորհրդակցություն է անցկացրել
16:50, 2 Փետրվար, 2012ԵՐԵՎԱՆ, 2 ՓԵՏՐՎԱՐԻ, ԱՐՄԵՆՊՐԵՍ: ԼՂՀ Ազգային ժողովի նախագահ Աշոտ Ղուլյանը փետրվարի 2-ին հրավիրել է աշխատանքային խորհրդակցություն՝ առաջինը խորհրդարանի ձմեռային արձակուրդների ավարտից հետո, ԱԺ ղեկավար կազմի և աշխատակազմի ծառայությունների պատասխանատուների մասնակցությամբ։ Ինչպես «Արմենպրես»-ին տեղեկացրին ԼՂՀ Ազգային ժողովի մամլո ծառայությունից, քննարկման հիմնական թեման 5-րդ գումարման Ազգային ժողովի 5-րդ նստաշրջանի օրակարգի ձեւավորման հարցն էր։
Այդ կապակցությամբ նշվել է, որ շրջանառության մեջ մտած 4 օրինագծից երկուսը պատգամավորական նախաձեռնության արդյունք է, իսկ երկուսը ստացվել է կառավարությունից։ Միեւնույն ժամանակ ակնկալվում է, որ նստաշրջանի օրակարգն առաջիկայում կհամալրվի ինչպես գործադիրի, նույնպես և պատգամավորների նոր օրենսդրական նախաձեռնություններով։
Խորհրդակցությանն այնուհետեւ անդրադարձ է կատարել միջազգային կառույցներում ՀՀ Ազգային ժողովի պատվիրակությունների ղեկավարների մասնակցությամբ հունվարի 18-ին Հայաստանի խորհրդարանում անցկացված խորհրդակցությանը ԼՂՀ ԱԺ նախագահի մասնակցության արդյունքներին։ Մասնավորապես, ներկայացնելով ՀՀ ԱԺ-ում անցկացված խորհրդակցությանը ղարաբաղյան կարգավորման հարցի շուրջ հնչած տեսակետները, խորհրդարանի նախագահը մատնանշել է դրանցից բխող հետեւություններն ու առաջիկա անելիքները։
Աշխատանքային խորհրդակցությանը քննարկվել են նաև հարցեր՝ կապված ընթացիկ ամսում սպասվող խորհրդարանական և այլ միջոցառումների կազմակերպման ու անցկացման խնդիրների հետ, տրվեցին համապատասխան հանձնարարականներ։
© 2009 ARMENPRESS.am