Վերաօծվել է Աքորիի Սուրբ Գեւորգ եկեղեցին
00:00, 4 Հոկտեմբեր, 2008
ՎԱՆԱՁՈՐ, 4 ՀՈԿՏԵՄԲԵՐԻ, ԱՐՄԵՆՊՐԵՍ (սեփ. թղթ. Վահագն Անտոնյան): Սուրբ
Գեւորգի տոնի նավակատիքին Գուգարաց թեմի առաջնորդ Սեպուհ եպիսկոպոս Չուլջյանի
հանդիսապետությամբ վերաօծվել է Լոռու մարզի Աքորի գյուղի, 13-րդ դարում
կառուցված, Սուրբ Գեւորգ եկեղեցին: Արարողությանը մասնակցում էին Ալավերդու
համայնքային ու Լոռու մարզային իշխանությունների ներկայացուցիչներ, Աժ
պատգամավորներ, գյուղացիներ, ինչպես նաեւ Աժ պատգամավոր, Ս.Գեւորգ եկեղեցու
վերակառուցման ու կահավորման բարերար Կարեն Սարիբեկյանը: Հաղպատի, Օձունի եւ
Ալավերդու հոգեւոր հայրերի մասնակցությամբ ու Սրբազան հոր ձեռամբ օծվել են
եկեղեցու Սուրբ սեղանը, խորանն ու մկրտության սուրբ ավազանը: Սրբազան
արարողության ավարտին Կ. Սարիբեկյանն իր բարերարության համար Սրբազանի կողմից
ստացել է Սուրբ Մեսրոպ Մաշտոցի փայտյա սրբապատկերը եւ օրհնության գիր: